TMD ishki ister mınıstrleri keńesiniń otyrysynda Qazaqstan avtokólik urlyǵy jáne kıberqylmyspen kúres boıynsha aqparat almasý máselelerin kóterdi, dep habarlaıdy almaty-akshamy.kz
Onlaın-kezdesýge Ázirbaıjan, Belarýs, Qazaqstan, Qyrǵyzstan, Moldova, Reseı, Tájikstan, Túrikmenstan, Ózbekstan ishki ister mınıstrlikteriniń jáne Armenıa polısıasynyń, sondaı-aq, TMD Atqarýshy komıtetiniń, TMD-daǵy uıymdasqan qylmysqa jáne qylmystyń ózge de qaýipti túrlerine qarsy kúresti úılestirý búrosynyń jáne TMD-daǵy terorızmge qarsy ortalyǵynyń delegasıalary qatysty.
Polısıa vedomstvolarynyń basshylary qylmysqa qarsy kúrestegi yntymaqtastyqtyń basym máselelerin qarady. Sondaı-aq, qatysýshylar COVID-19 pandemıasy jaǵdaıyndaǵy qylmysqa qarsy is-qımyldy, jedel aqparat almasýdy jáne qylmystardy ashý jáne tergeý tájirıbesin, esirtki bıznesine qarsy kúrestegi ózara is-qımyldy kúsheıtýdi, blokcheın-tehnologıalar men krıptovalútalardy paıdalana otyryp jasalatyn qylmystardyń aldyn alýdaǵy yntymaqtastyqty jáne taǵy basqa máselelerdi talqylady.
Qazaqstandyq taraptyń bastamasy boıynsha Mınıstrler Keńesiniń kún tártibine avtokólik urlyǵy jáne ınternet-alaıaqtyqqa qarsy kúres máseleleri engizildi.
Erlan Turǵymbaev TMD elderi İİM-niń derekter bazasyndaǵy málimettermen ózara almasý Dostastyqqa qatysýshy elderdiń aýmaǵynda qoldy bolǵan kólik quraldaryn aıdap ketý, urlaý jáne ótkizý joldaryn tıimdi ashýǵa múmkindik beretinin atap ótti.
Qazaqstan İİM basshysy otyrysqa qatysýshylardy aqparattyq tehnologıalardy paıdalana otyryp jasalǵan qylmystardy ashýda ózara is-qımyldy jandandyrýǵa shaqyryp, ınternet-alaıaqtyqtyń shekarasy joq jáne azamattarǵa eleýli zalal keltiretinin basa aıtty. Osyǵan baılanysty, polısıa vedomstvolary arasynda kúsh-jigerdi shoǵyrlandyrý jáne tájirıbe almasý talap etiledi, - dep málimdedi Erlan Turǵymbaev.
Sonymen qatar, mınıstr óz sózinde Qazaqstannyń İİM qylmysqa qarsy kúres máseleleri boıynsha TMD memleketaralyq baǵdarlamalarynda kózdelgen is-sharalardy tıimdi oryndaıtynyn málimdedi.
Erlan Turǵymbaev izdestirý jumystary, zańsyz kóshi-qon, ekstremızm men terorızmge qarsy kúres, esirtki bıznesine qarsy is-qımyl salasyndaǵy belsendi yntymaqtastyqty atap ótip, áriptesterin qazaqstandyq polısıany reformalaý barysymen tanystyrdy.
Otyrys qorytyndysy boıynsha TMD-ǵa qatysýshy memleketterdiń qylmysqa qarsy kúres salasyndaǵy halyqaralyq ózara is-qımylyn nyǵaıtý jóninde birlesken sheshimder qabyldandy.