Oblys aýmaǵynda sý tasqyny jaǵdaıyna baqylaý júrgizý jumystary turaqty túrde júrip jatyr
Túrkistan oblystyq TJD-niń jeke quramy qyzmeti kúsheıtilgen rejımge kóshirildi, dep habarlaıdy Almaty-akshamy.kz.
«Kazgıdromet» RMK boljamyna sáıkes, Túrkistan oblysy aýmaǵynda 31 qańtar men 3 aqpan aralyǵynda jaýyn-shashyn mol jaýyp, aýa temperatýrasy +12 gradýsqa kóterilýi múmkin. Aýa raıynyń bulaısha kúrt jylýy Syrdarıa ózeniniń joǵarǵy aǵysynan kelgen sýdyń kóbeıýi, «Shardara» sý qoımasynyń merziminen buryn tolýyna ákep soǵýy múmkin. Sondaı-aq oblys aýmaǵynyń taýly jotalarynan bastaý alatyn Arys, Keles, Badam, Boraldaı, Aqsý, Shaıan ózenderinde sýdyń deńgeıi kóterilip, jaǵdaıdy kúrdelendirýi yqtımal. Sondyqtan Túrkistan oblystyq TJD jeke quramy da 28 qańtardan bastap qyzmettiń kúsheıtilgen túrine aýystyryldy», - delingen departament habarlamasynda.
Oblys aýmaǵynda sý tasqyny jaǵdaıyna baqylaý júrgizý jumystary turaqty túrde júrip jatyr. Sońǵy aptada oblys aýmaǵynda 51 shaqyrym kanal, 31 shaqyrym aryq-atyzdar mehanıkalyq tazartýdan ótkizildi. Bógen ózeninde 4,2 shaqyrym jaǵa bekitý, nyǵaıtý jumystary júrgizildi, Sondaı-aq 14 shaqyrym qashyrtqy arnalardyń túbi tereńdetilip, keńeıtildi. Otyrar aýdany aýmaǵyndaǵy Syrdarıa ózeni boıyndaǵy qorǵanys dambalary 10 jerinen nyǵaıtyldy. Bul baǵyttaǵy jumystar jalǵasyn tabýda. Qum toltyrylǵan qaptyń sany 48 myńǵa jetkizilip, ınertti materıaldardyń qory arttyrylýda. 144 dana motopompa daıyndaldy. Syrdarıa ózeniniń aǵyny kúndelikti baqylaýǵa alyndy.
«Qazirgi kezde «Shardara» sý qoımasynda 4 mlrd 409 mln tekshe metrden astam sý jınalǵan. Iaǵnı, sý qoımasy 85%-ǵa tolǵan. Bul ótken jyldyń tıisti kezeńimen salystyrǵanda 1 mlrd tekshe metrge artyq. Al, «Kóksaraı» sý rettegishine ótken jylmen salystyrǵanda 1157 mln. tekshe metrden artyq sý jınalǵan. Syrdarıa ózeni arqyly «Shardara» sý qoımasyna kórshi elderden ortasha eseppen sekýndyna 1500 tekshe metr sý kelip, sý qoımanyń tómengi aǵysyna 1111 m3/sek sý shyǵarylýda», - dep tolyqtyrdy uıym.