Lısenzıasyz jumys isteıtin mektepterge qatysty mınıstrliktiń aýmaqtyq departamentteri ákimshilik is qozǵady.
Oqý-aǵartý mınıstrliginiń Bilim salasynda sapany qamtamasyz etý komıteti jáne onyń aýmaqtyq departamentteri bilim berý uıymdaryna monıtorıń júrgizý barysynda birqatar quqyq buzýshylyqtardy anyqtady. Bul týraly Almaty-akshamy.kz mınıstrlikke silteme jasap habarlaıdy.
Tekseris nátıjesinde 2022 jyldyń sońynda 56 mektep lısenzıasyz jumys istegeni belgili boldy. Onyń ishinde 40 memlekettik, 16 jekemenshik mekeme. Lısenzıasyz jumys isteıtin mektepterdiń eń kóbi Astana jáne Almaty qalalaryna, Atyraý, Almaty, Batys Qazaqstan, Túrkistan, Jetisý, Mańǵystaý jáne Jambyl oblystaryna tıesili.
Búgingi tańda 11 mektep bilim berý qyzmetine lısenzıa aldy. Úsh mekteptiń materıaly sottyń qaraýynda. 42 mektepke qatysty sot lısenzıasyz qyzmet kórsetkeni úshin aıyppul taǵaıyndaý týraly qaýly shyǵardy.
«Zańnamaǵa sáıkes, barlyq mektepter bilim berý qyzmetin bastamas buryn ruqsat alýy kerek. Mektepke bilim berýmen aınalysý quqyǵy lısenzıa alǵan sátten bastap qana beriledi. Lısenzıanyń joqtyǵy mekteptiń jaramdylyq tekserýinen ótpegenin nemese ruqsat alý úshin qujattardy tapsyrmaǵanyn bildiredi. Lısenzıasyz mektepter bilim týraly memlekettik úlgidegi qujattardy, ıaǵnı negizgi jáne jalpy orta bilim týraly atestattardy bere almaıdy. Lısenzıasyz jumys isteıtin mektepterge qatysty mınıstrliktiń aýmaqtyq departamentteri ákimshilik is qozǵady. Búgingi tańda sot sheshimimen 42 mektepke lısenzıasyz bilim berý qyzmetin júrgizgeni úshin aıyppul salyndy. Eger mektep zańdy tulǵa retinde memlekettik tirkelgen sátten bastap alty aı ishinde lısenzıa almasa, onda ol sot tártibimen jumysyn toqtatady», - dedi Oqý-aǵartý mınıstrligi Bilim salasynda sapany qamtamasyz etý komıtetiniń tóraǵasy Ernur Daýenov.