Búgin – respýblıkalyq «Naýryznama» onkúndiginiń 4-shi kúni. Negizgi úlken zalynyń ortasyna bıik kóterilgen shańyraq ornatylǵan Ábilhan Qasteev atyndaǵy QR Memlekettik óner mýzeıinde aıtýly kúnniń qurmetine tanymdyq, taǵylymdyq ekskýrsıa ótti.
Iá, shańyraq – qasıetti uǵym. Atam qazaq shańyraqtyń shaıqatylmaı, ýyqtardyń durys ári tez shanshylýyn jaqsy yrymǵa balaǵan. Ol – otbasy sımvoly. Al árbir otbasy – memlekettiń ýyǵy.
Ekskýrsıany «Mýzeı pedagogıkasy jáne ekskýrsıa» bóliminiń qyzmetkerleri Sholpan Nuǵymanova men Gúldenaı Bekbaýlıeva mýzeıdiń «Qazaqstan sándik-qoldanbaly óneri» jáne «Zamanaýı sándik-qoldanbaly óneri» turaqty ekspozısıalary boıynsha júrgizdi.
«Qazaq mádenıetinde shańyraqtyń alar orny erekshe. Onyń turmys-tirshilikte san qyrly qasıeti bar. Kúndelikti turmysta shańyraqty qazaqtyń kıiz úıiniń tóbesinde ýyqtardy biriktirip turatyn element retinde qarastyrady. Úı tikkende shańyraq kóterýdi sol áýlettiń bedeldi, abyroıly er-azamatyna tapsyrǵan. Al otbasynyń basqa úlken-kishisi bir-birimen septesip ýyqtaryn shanshyǵan. Bul da sol áýlettiń aýyzbirshiligin, yntymaq-birligin, bir-birine degen baýyrmaldyǵyn kórsetse kerek», – deıdi Ábilhan Qasteev atyndaǵy QR Memlekettik óner mýzeıiniń «Mýzeı pedagogıkasy jáne ekskýrsıa» bóliminiń qyzmetkeri Gúldenaı Bekbaýlıeva.
Mýzeıge kelgen, ulttyq qundylyqtar týraly áserli áńgimelerge qulaq túrgen "Arystan" mamandandyrylǵan lıseı oqýshylaryna sondaı-aq, uly dala mádenıetiniń jaýharyna aınalǵan kıiz úıdiń qalaı tigiletini, ýyq, týyrlyq, úzik, túndik syndy bólshekteri, onyń ishindegi árqaısysy pálsapalyq mánge ıe san alýan turmystyq buıymdary jaıynda da qyzyqty hám tanymdyq málimetter tarqatyldy. Bul ásirese, búgingi jas býyn - erteńgi bir-bir úıdiń egesi, otaǵasylary úshin taǵylymdy boldy.
Eske sala keteıik, Ulystyń uly kúni – Naýryz merekesin toılaý aıasynda elimizde 14-23 naýryz aralyǵynda «Naýryznama» onkúndigi jarıalanǵan bolatyn. Ár kúnniń taǵylymǵa toly óz ataýy bar. Al búgin – Shańyraq kúni.