Qytaıdyń ońtústigindegi Gýandýn provınsıasyndaǵy Gýanchjoý qalasynyń turǵyndary osy iri qalada koronavırýsqa shaldyǵý oqıǵalarynyń kóbeıýine baılanysty azyq-túlik qoryn jınaqtaýǵa tyrysyp jatyr, dep habarlaıdy almaty-akshamy.kz QazAqparatqa silteme jasap.
Qytaılyq BAQ jazýynsha, jergilikti sheneýnikterdiń megapolıste azyq-túlik qory jetkilikti ekendigi týraly málimdemesine qaramastan, Gýanchjoýdaǵy keıbir bazarlar men birqatar kóterme saýda dúkenderinde halyqtyń azyq-túlikti kóptep alyp júrgeni baıqalǵan.
Gýanchjoýdyń halqy tyǵyz ornalasqan Baıýn aýdanynda ǵana jarym-jartylaı karantın engizilgen.
Onda kovıd shekteýleri aımaqtaǵy 3,7 mln halyqtyń 5 myńǵa jýyq turǵynyna qatysty boldy.
Osy arada, qurlyqtyq Qytaı provınsıalarynyń kópshiligin jaılaǵan COVID-19 vırýsynyń keıde órship turýy shamamen 18 mln halqy bar Gýanchjoýdy azyq-túlikpen qamtamasyz etýge keri áserin tıgizýde.
Dúısenbi kúni ótken brıfıńte Beıjiń bıligi jurtshylyqty Qytaı astanasyn azyq-túlikpen qamtamasyz etý jaǵynan qazirgi jaǵdaıdyń turaqty jáne olar jetkilikti mólsherde ekenine sendirdi. Ótken táýlikte Beıjińde COVID-19 ınfeksıasyn juqtyrýdyń tórt oqıǵasy anyqtaldy. Dúısenbi kúni Qytaı úkimeti aımaq bıligin júk tasymalynyń kedergisiz qozǵalysyn qamtamasyz etýge jáne kólik joldaryn dáleldi sebepsiz jappaýǵa úndegen habarlama taratqan.
Resmı statısıka boıynsha, 10 sáýirde Gýanchjoýda koronavırýs juqtyrýdyń 27 jergilikti oqıǵasy tirkeldi.
Óz kezeginde, Qytaı materıginde toǵyzynshy kún qatarynan aýrýǵa shaldyǵýdyń eń joǵary resmı kórsetkishi tirkelgen Shanhaı qalasynda ótken táýlikte COVID-19 ınfeksıasyn juqtyrýdyń 23 myńnan astam jergilikti oqıǵasy tirkeldi.