Búgin Úkimet otyrysynda QR Ulttyq ekonomıka mınıstri Álibek Qýantyrov ortalyq jáne jergilikti atqarýshy organdar nazar aýdarýy tıis is-sharalardy atady, dep habarlaıdy Almaty-akshamy.kz.
Onyń atap ótýinshe, ortalyq jáne jergilikti atqarýshy organdar eń aldymen kóktemgi egis jumystaryn tıimdi júrgizýge keshendi qoldaý kórsetýge, óńdeý ónerkásibinde josparlanǵan ósý qarqynyn qamtamasyz etýge basa nazar aýdary kerek.
Áleýmettik mańyzy bar azyq-túlik taýarlarynyń baǵasyna turaqty monıtorıń júrgizip, turaqtandyrý qory arqyly olardyń qoljetimdiligin qamtamasyz etýi tıis.
Sonymen qatar ınvestor tartý jáne súıemeldeý boıynsha naqty jumysty barlyq deńgeılerde jandandyrýy qajet.
Turaqty jáne ýaqytsha jumyspen qamtýdy qoldaý baǵdarlamalaryn iske asyrý aıasynda eńbek naryǵyndaǵy turaqtylyqty qamtamasyz etkeni jón.
Eksporttaýshylardyń jańa naryqtarǵa shyǵýyna qoldaý kórsetý, eksporttaý baǵyttarynyń balamaly joldaryn qalyptastyrý kerek.
«Joǵaryda atalǵan is-sharalardy tolyqtaı iske asyrý elimizdiń ekonomıkasynyń ósýin jedeldetýge múmkindik beredi», - dedi Álibek Qýantyrov.