Aǵymdaǵy jyldyń 21 mamyr kúni Qazaqstan Respýblıkasy Aqparat jáne qoǵamdyq damý mınıstrligi janyndaǵy «Din máseleleri jónindegi Respýblıkalyq aqparattyq-túsindirý tobynyń» músheleri «Mobile X» servıstik kompanıasynyń qyzmetkerlerimen jáne jalǵa alýshylarmen kezdesý ótkizdi. Kezdesýdiń maqsaty – ekstremızm men terorızmniń jáne teris dinı aǵymdar yqpalynyń aldyn alý.
Ekstremızm men terorızm máselesi nemquraıdy qaraıtyn jaıt emes. Bul máseleni jiti de qyraǵy baqylaǵan abzal. Jalǵan dinniń jetegine erip, Sırıa, Irak sekildi elderge adasyp barǵan jerlesterimizdiń aqparatynan kópshilik habardar. Ekstremızım men terorızmniń tamyry tereńde jatyr. Osyny jan-jaqty zerttep, túrli jaǵdaılardyń bolý yqtımaldyǵyn eskere kele, memleket tarapynan qaýiptiń aldyn alý sharalary, saqtandyrý, túsindirý, keńes berý jumystary tolassyz júrip jatyr. Nátıje de joq emes. Resmı aqparattarǵa súıener bolsaq, keıingi úsh jylda dinı aǵymdardyń yqpalymen, ekstremızm men terorızm qaýpin tóndirýge baılanysty shet el asyp, shekara basyp, basqa elderge ótip jatqan adasqandar men arandalǵandar tirkelmegen eken. Biraq bul teris dinı aǵymdardyń, destrýktıvti toptardyń qaýpi seıildi degen sóz emes. Kerisinshe, pıǵyly jaman dinı aǵymdar álemdi dúrliktirgen pandemıany paıdalanyp, óz áreketterin júzege asyryp jatqandyǵyn arnaıy mamandar aıtyp otyr. Búgingideı tehnologıalar damyǵan ınternet zamanynda olar múmkindikti qalt jibermeıtini anyq. Ásirese, árkimniń qolynda júretin smartfondar arqyly da arandalyp qalǵandar az emes.
Qazaqstan Respýblıkasy Aqparat jáne qoǵamdyq damý mınıstrligi janyndaǵy Din máseleleri jónindegi respýblıkalyq aqparattyq-túsindirý tobynyń múshesi Erlan Jumanuly Mataev kezdesýde osy baǵytty qamtydy: «Qazirgi kezde din máselesi elimizde óte kúrdeli, aýqymdy taqyryptyń biri bolyp tur. Din men ekstremızm, terorızm baılanysty bolǵannan keıin ulttyq qaýipsizdik deńgeıinde qaralýda. Endi bul taqyryptyń sizderge qandaı qatysy bar? Sizderge ne úshin kelip otyrmyz? Sizder saýda jasaý kezinde kóp azamattarmen kezdesesizder. Onyń ústine uıaly telefon satatyndardyń basym kópshiligi din ustanýshylar bolyp keledi. Sizder osy azamattarmen nemese basqa kisilermen kezdeskende dinge baılanysty qandaı da bir suraq, túsingilerińiz keletin dinı jaǵdaılar bolsa, kez kelgen adamnan emes, arnaıy mamandarǵa júginip, kókeılerińizdegi saýalǵa dinı qyzmetkerlerden jaýap alǵandaryńyz durys. Sonymen qatar búginde bárimiz derlik áleýmettik jelilerde otyramyz, ınternetten aqparat alamyz. Sol aqparattardyń senimdi derekkózderden ekendigine asa mán bergenderińiz jón. Qazirgi tańda kóptegen teris dinı aǵymdar bar. Olar kishkentaı ǵana qýysta otyryp-aq ózderiniń saıasatyn júrgizip, qataryn tolyqtyryp jatyr. Sondyqtan kez kelgen aqparatqa sene berýge bolmaıdy. Ol aqaparttyń shyn nemese ótirik ekenin anyqtap alý qajet bolyp tur. Qatelesý, adasý, arandalý osyndaı aqparattardan bolyp jatqany búginde dáleldengen. Iaǵnı, kez kelgen aqparatty arnaıy mamandar men dinı qyzmetkerlerge teksertip alǵan abzal.
Ózderińiz bilesizder, pandemıa bolǵannan keıin qulshylyq, ǵıbadat oryndary jabyq. Dinı izdenister ınternet arqyly júrýde. Árkim ár jerden izdeıdi. Siz bolmasańyz da sizdiń týysyńyz, aǵaıynyńyz, dosyńyz, tanysyńyz osyndaı máselemen kezdesýi múmkin. Bir qaraǵanda bul aıtyp otyrǵanymyz óte qarapaıym nárse. Biz osy salada istegennen keıin kóp jaǵdaıda osyndaı qarapaıym nárselerge mán bermeı, kóptegen qatelikke urynǵandardy bilemiz. Sol sebepti de biz sizderge eskertip jatyrmyz. Nemquraıly qaramańyzdar. Mysaly úshin, Sırıa ketkender, basqa da ekstremıstik, terorıstik pıǵyldaǵy adasýshylarmen jumys júrgizemiz. Solardan suraǵanymyzda qateliktiń basy osyndaı qarapaıym ǵana nárselerden bastalǵanyn aıtady. Bazarda, adam kóp júretin jerlerde kezdesip qalyp, ketip qalǵan qatelikterdiń zardabyn tartyp júrgenderdi kóptep mysal etýge bolady. Qaıtalap aıtamyn, bul máselege beıjaı qaramańyzdar».
Kezdesý barysynda osy baǵyttaǵy áńgimeler aıtylyp, jınalǵan jurt kókeılerine kóp nárse túıip ketkenin olardyń suraqtarynan, oı bildirýlerinen baıqadyq.
Iá, shyndyǵynda, halyq arasynda nemquraıdylyq pen beıjaılyq baryn da kórip júrmiz. Qatelikke urynyp, arandalatyndar tek basqalar, men emes dep burys oılaıtyndar da bar. Bulaı oılaý durys emes. Qaýip pen qater aıaqasty... Shalys basyp, qatelikke uryný kútpegen jerden bolady. Eger bári ońaı bolsa, din máselesi memlekettik deńgeıde kóterilmes edi. Sondyqtan saqtanaıyq! Saq bolaıyq!