Dinniń atyn jamylǵan destrýktıvti toptar talaıdyń sanasyn ýlap, myńnyń mıyn aınaldyrdy. Adasýshylar atoılap shekara asty. Memleket shuǵyl áreketke kóship, ekstremızm men terorızmniń aldyn alý boıynsha mınıstrlik, agenttikter quryldy. «Jýsan» operasıasy uıymdastyryldy. Adasqandardy elge qaıtardy. Destrýktıvti dinı toptar men aǵymdardy, sektalardy zertteıtin, adasqandarǵa keńes berý, olardy ońaltý ortalyqtary ashyldy.
«Jasyratyny joq, dinı ekstremızım men terorızmge baılanysty elimizde kóptegen jaǵdaılar boldy. Bir qýanarlyǵy, QR Ulttyq qaýipsizdik komıtetiniń málimdeýinshe, sońǵy úsh jyldyń kóleminde birdebir qazaqstandyq azamat Sırıa sıaqty elderge adasýshylyqpen attanbapty. Kerisinshe shet el asqan adasýshylardy «Jýsan» operasıasy arqyly elimizge ákeldik. Men Almaty irgesindegi «Zarechnyı», «Jaýǵashty» sıaqty qatań rejimdegi túrmelerde sabaq beremin. Sońǵy 5 jyldyń ishinde qanshama adasqan taǵdyrlardy kórdim», – deıdi Qanat Ótebaev.
Osy tusta Qanat myrzadan taǵdyrlardyń adasýyna sebep bolǵan jaıtty naqtylaı túsýin ótindik. «Destrýktıvti toptar eń birinshi memleket basshysyn, ımamdardy, sondaı-aq Qazaqstandaǵy bilim berý oryndaryn jamandap, qurbandyǵynyń solardyń aıtqanyna qulaq asýyna tosqaýyl qoıyp tastaıdy. Bul jerde dinnen basqa da dúnıeler tur. Gıpnoz bolýy da múmkin. Sosyn Dúnıejúzilik densaýlyq uıymy Shrı-Lanka degen jerdegi shópti qurtý úshin jylyna kóp qarajat quıady. Bul shóp adamnyń esinen adastyryp, ne istep, ne qoıǵanyna baqylaý jasaı almaıtyndaı dárejege jetkizedi eken. Sodan dári jasap ishken adam 7-8 saǵatqa deıin esin bilmeı qalady deıdi. Túrmede otyrǵandardyń arasynda sondaı adamdar da bar. Olardyń qolynda telefon joq. Baıaǵydaı pir tutatyn sheıhsymaqtary taǵy joq. Bizdiń sabaqqa qatysady. Eki-úsh sabaqtan keıin sanasy ashylyp, jylaǵanyn kórseńiz... Kózderinen sorasy aǵady. Túzelip jatyr, biraq keıbiriniń artyndaǵy otbasy túgel ýahabılik baǵytpen ketip qalǵan ǵoı
Qanat Ótebaev olardy qoǵamǵa qaıta qosýdaǵy jaıtty da aıtyp berdi.
– Áý basta «Jýsan» operasıasy bastalǵanda, bul iske qarsy shyqqandardyń biri men edim. «Elge ákelýdiń qajeti ne? Olardyń mıynda vırýs bar. Adasqandardy qamaıtyn jeke túrme joq. Bireý bolyp kirip, júz bolyp kóbeıse, qaıtemiz?» degen oı bolǵany ras. Alaıda men qate oılaǵan ekenmin. Berilgen sabaqtan nátıje shyǵyp jatyr. Olarǵa bul isteriniń eshqandaı da jıhadqa jatpaıtynyn, barǵan jerińde ólseń, aram ólim bolatynyn aıtamyz. Olardy teris aǵymdar óz múddelerine paıdalanǵanyn jetkizemiz. Tipti, munyń bıznes ekenin dáleldeımiz. Janyna tıetin qarapaıym mysal keltiremiz. Osyndaıda qazaǵymyzdyń: «Óz balańdy ózeginen tepseń de ketpeıdi, ózgeniń balasyn kisendeseń de turmaıdy» degen sózi eske túsedi. Amal joq, elimizden shyqqan adasýshylardy qoǵamǵa qaıta qosý, olardy túzeý - mindetimiz, – dep túıindedi sózin Qanat Ótebaev.
Jalpy, muny «bálen jerde baqyr bar, barsań, taqyr da joq» dep te qorytyndylaýǵa bolady. Dinı fanatızmge shaldyqqandardyń baqytqa jetkeni jóninde birde-bir derek taba almaısyz. Sebebi, dinı fanatızm durys jol emes. Ol jolǵa túsýdiń árisi – ajal, berisi – abaqty, azap. Sondyqtan kim-kim de teris dinniń jetegine erip, ómirin óksikke aınaldyrmasa eken degimiz keledi. Ár qadamdy sanap basyp, ár sózdi talǵap tyńdaǵan durys. Saqtanaıyq! Saq bolaıyq!
«AQSHAM-AQPARAT».