Býdapesht qalasynda 45-shi shahmat Olımpıadasy (45th FIDE Chess Olympiad) ótýde.
Bul halyqaralyq týrnırge álemniń 180-nen astam elinen shahmatshylar qatysýda. Olardyń qatarynda Qazaqstannyń áıelder jáne erler quramalary da bar, dep habarlaıdy aqshamnews.kz.
Birinshi týrda Qazaqstannyń áıelder quramasy (Merýert Kamalıdenova, Ksenıa Balabaeva, Alýa Nurman jáne Amına Qaıyrbekova) Ýrýgvaı komandasyn 4-0 esebimen aıqyn basymdyqpen jeńiske jetti.
Erler quramasy (Qazybek Nógerbek, Álisher Súleımenov, Ramazan Jálmuhanov jáne Aldıar Ansat) Sýrınam quramasynan dál osyndaı eseppen basym tústi.
Ekinshi týrda Qazaqstan quramalary úshin nátıje sál kúrdelirek boldy. Áıelder quramasy Fınlándıa komandasymen kezdesti. Oıyn barysynda Bıbisara Asaýbaeva Anastasıa Keınánenmen teń tústi. Al Alýa Nurman Lıla Bederdınge ese jiberdi. Degenmen, Ksenıa Balabaeva men Amına Qaıyrbekova jeńiske jetip, týr nátıjesi 2½-1½ bolyp Qazaqstannyń paıdasyna sheshildi.
Erler quramasy ekinshi týrda Monako quramasyn 3½–½ esebimen jeńdi. Denıs Mahnóv Amır Bagerımen teń oınasa, Álisher Súleımenov, Ramazan Jálmuhanov jáne Aldıar Ansat qarsylastaryna mat qoıdy.
Úshinshi týrda Qazaqstannyń erler quramasy Vetnam quramasymen, al áıelder quramasy Avstrıa quramasymen baq synaıtyn bolady.
Kerek derek
Shahmat Olımpıadasy – bul shahmattyń halyqaralyq arenadaǵy eń bedeldi jarystarynyń biri. FIDE (Halyqaralyq shahmat federasıasy) uıymdastyratyn bul týrnır alǵash ret 1927 jyly Londonda ótti. Búgingi kúni shahmat Olımpıadasy ár eki jyl saıyn ótkizilip, álemniń túkpir-túkpirinen jınalǵan myqty shahmatshylary baq synaıdy. Qazaqstan quramasy da bul týrnırde birneshe ret sátti óner kórsetip, elimizdiń namysyn qorǵaýda.
Shahmat Olımpıadasy tek komandalyq jarys emes, sonymen qatar shahmat mádenıetin nasıhattaý, elder arasyndaǵy yntymaqtastyqty nyǵaıtý jáne shahmattyń damýyna úles qosý maqsatyndaǵy mańyzdy sharalardyń biri bolyp tabylady.
Eske salaıyq buǵan deıin shahmattan ótetin 45-shi Olımpıadaǵa el quramasynan kimder baratyny jaıynda jazǵan bolatynbyz.