Ótken jyly Qazaqstan kórshi memleketterden 18,3 mıllıard kVt·saǵ elektr energıasyn ımporttady, bul 2022 jylmen salystyrǵanda shamamen 5 ese kóp, dep habarlaıdy aqshamnews.kz.
Ulttyq statısıka búrosynyń derekterine súıensek, 2022 jyly ımport kólemi eksporttan 7 ese asyp tústi. Mundaı úlken kólemdegi ımport Qazaqstannyń energetıkalyq táýelsizdigin aıtarlyqtaı tómendetti.
2023 jyldyń qańtar-jeltoqsan aılarynda eldegi jalpy energıa tutyný kólemindegi ımporttyń úlesi 14,2%-ǵa jetti, al 2022 jyly bul kórsetkish nebári 3,2% bolǵan edi.
Qazaqstan Respýblıkasynyń Energetıka mınıstrliginiń málimetinshe, elimizdegi barlyq elektr stansıalarynyń jalpy ornatylǵan qýaty 20,4 GVt-ty quraıdy. Aldaǵy jyldarda energıa tutyný deńgeıiniń ósýi jáne óndiristiń azaıýy kútilýde, bul jaǵdaı eldegi energıa tapshylyǵyn saqtap qalady.
Mundaı jaǵdaıdy boldyrmaý úshin ornatylǵan qýattylyqty 26,5 GVt-qa deıin ulǵaıtý qajet. Mınıstrliktiń esebine sáıkes, jańa generasıalyq qýattardy iske qosý úshin tek qoldanystaǵy jylý jáne sý elektr stansıalarynyń jabdyqtaryn jańartý jetkiliksiz, sonymen qatar jańa nysandardy salý qajet. Bul gaz elektr stansıalaryn, jańartylatyn energıa kózderin (JEK) damytý jáne Qazaqstandaǵy alǵashqy atom elektr stansıasyn (AES) salýdy qamtıdy. Aldyn ala esepteýler boıynsha, AES elge keminde 2,4 GVt qýat beredi.
Energetıka mınıstrligi 2030 jylǵa deıingi elektr energetıkasynyń boljamdy balansyn usyndy. Qujatta aldaǵy jyldardaǵy elektr energetıkasynyń damý senarıi berilgen. Atap aıtqanda, 2024 jáne 2025 jyldary elde energıa tapshylyǵy saqtalady degen boljam bar.
Qazaqstan 2026 jyly ǵana energıa profısıtine shyǵýy múmkin, biraq tek jańa generasıalyq qýattar iske qosylǵan jaǵdaıda. Eger bul júzege aspasa, elde energıa tapshylyǵy uzaq ýaqyt boıy saqtalady.