Shahmatty mektep baǵdarlamasyna engizý jónindegi pılottyq jobaǵa 30 mektep qatysady.
Qazaqstanda shahmatty damytý jospary men eldegi mektepterge qosymsha sabaqtar engizý jóninde ÓKQ alańynda RAI birinshi vıse-prezıdenti, Azıa shahmat federasıasynyń vıse-prezıdenti Dármen Sádýaqasov aıtyp berdi.
Spıkerdiń aıtýynsha, kelesi oqý jylynan bastap, shahmatty 1-4 synyp oqýshylaryna qosymsha pán retinde engizý tájirıbesiniń aıasynda 30 mektepti qamtý josparlanyp otyr, dep habarlaıdy Almaty-akshamy.kz.
«QSHF Memleket basshysynyń jáne bizdiń bas demeýshimizdiń qoldaýymen elde shahmatty júıeli túrde damytyp keledi. Búginde bizde shahmatty odan ary damytý úshin barlyq múmkindik bar. Ózderińiz biletindeı, bizdiń áıelder quramasy álemdegi úzdik shahmatshylar bolyp sanalady. Sáýir aıynda biz álem quramasymen mach ótkizdik. Bizdiń balalar men jasóspirimder quramasy da álemde úzdikterdiń qatarynda jáne osy baǵytta biz erler quramasyn qalyptastyryp, talanttardy irikteý jumystaryn kúsheıtemiz», - dedi D.Sádýaqasov.
Spıkerdiń sózine qaraǵanda, Federasıa Oqý-aǵartý mınıstrligi jáne Ǵylym jáne joǵary bilim mınıstrligimen birlesip ádistemelik jumys júrgizgen. Sondaı-aq, oǵan halyqaralyq sarapshylar tartylyp, osyǵan uqsas joba engizilgen Ispanıanyń keısi zertteldi.
«Biz úshin bul óte mańyzdy baǵyt, bul - balalarǵa sapaly shahmat bilimin berý múmkindigi. Bizdiń maqsatymyz – elimizdegi árbir bala, bastaýysh synyp oqýshylary, meıli aýyl, meıli qala mektebi bolsyn, óz tańdaýy boıynsha shahmatpen aınalysa alsa degen oı. Shahmat adamnyń oı-órisin damytady, ol logıkany, eske saqtaý qabiletin, synı oılaýdy, nazardy shoǵyrlandyrýdy damytýǵa úlken ımpúls beredi. Qazaqstanda biz osy sıpattaǵy ǵylymı jumysty 12 mektep negizinde júrgizdik», - dep bólisti ol.
Sonymen qatar, shahmat úıretetin oqytýshylardy daıyndaý men olardyń biliktiligin arttyrý jumystary da júrgizilýde.