Shabyttanýdyń tıimdi tásilderi
Búgingideı qaınap jatqan ómirde ózińizdi únemi shabyttandyryp, energıa ala bilý óte mańyzdy. Áıtpese, qym-qýyt myna zamanda eshteńege zaýqyńyz soqpaı, ózińizdi joǵaltyp alýyńyz ábden múmkin.
Jigerińiz qum bolyp, shabytyńyz sarqylyp júrse, kelesi áreketterdi jasap kórińiz:
Kóbirek serýendeńiz! Oıdy bir júıege keltirýdiń tıimdi ádisteriniń biri – kóshege shyǵyp, boı jazý. Serýendeý shyǵarmashylyq oıǵa jetelep, kóńil-kúıdi jaqsartyp, ómirge basqasha qaraýǵa kómektesedi. Jaqyn mańdaǵy saıabaqqa baryp, taza aýada dem alyńyz, tabıǵattyń ásemdiginen rahattanyp, aınalańyzdy baqylańyz. Bir sátke bolsa da, problemalaryńyz, mindetterińiz men maqsataryńyzdy umytyp, sol sátte bolýǵa tyrysyńyz.
Sýretke túsirińiz. Nazaryńyzdy aýdarǵannyń bárin sýretke tartyp alyńyz. Keıinnen eshbir maqsatsyz túsirilgen kadrlardan buryn eshqandaı kóz toqtatyp qaramaǵan zattaryńyzdan nemese aınalańyzdan qyzyqty detaldar, kreatıvti obrazdar, tipti qyzyqty adamdardy baıqaýyńyz múmkin.
«Mıyńyzdy qozǵańyz». Ol úshin frıraıtıng dep atalatyn ádis jaqsy kómektesedi. Bul tásildiń arqasynda basta júrgen oılardan arylyp, bir jeńildep qalýǵa bolady. Ol úshin bir paraq qaǵaz alyp, oǵan kópten beri oıyńyzda júrgenniń bárin, tipti jańa ǵana kelgen oıdy da tizip shyǵasyz. Jazǵanyńyz bir-birimen qıyspaýy, basy bar, aıaǵy joq bolýy múmkin. Biraq ony túzetip áýre bolýdyń qajeti joq. Bárin jazyp bolǵannan keıin, qaıtadan bir qarap shyǵyp, qajetsiz dep sanaǵandaryńyzdy syzyp tastańyz. Al qalǵan jazýyńyzdan dereý iske asyrýdy qajet dep sanaıtyndaı óte qundy oılar shyǵyp qalýy múmkin.
Ómirbaıan oqyńyz. Oıyńyzǵa alǵanyńyz ózińizge jónsiz, retsiz dep kórinse, belgili, tanymal, jetistikke jetken adamdardyń ómirbaıanyn oqýǵa bolady. Ózińiz burynnan beri ómir jolyna, jetistikterine qyzyǵatyn adamnyń ómirlik jolyn zertteńiz, izdenińiz. Sizdi óz isimen, áreketimen shabyttandyratyn sol adamnyń tájirıbesinen ózińizge qoldanýǵa bolatyn ne bar ekenine mán berińiz, soǵan uqsaýǵa, tipti odan asýǵa tyrysyńyz.
Tizim jasańyz. Aldaǵy ýaqytta isteımin, baramyn dep júrgen isterińiz ben oılaryńyzdyń bárin josparlap, tizimdep shyqqan jón. Tipti armandaryńyzdy da jazyp, armandar kartasyn jasasa da, artyq emes. Ony jazýyn jazyp, kórinbeıtin jerge tyǵyp tastaǵansha, jıi-jıi qarap otyrǵanyńyz jaqsy. Aıqyn ári anyq etip jazylǵan maqsattar naqty áreketter jasaýǵa ıtermeleıdi.
Jańa nárseni úırený. Ózińizge tanys emes mamandyq, kásip bolmasa aspap úırený de mıǵa jaqsy áser etedi. Bul tásildiń arqasynda aılar boıy sheshe almaı júrgen máselelerge basqasha kózqaras, basqa jolmen sheshim shyǵarý sıaqty keremet oılar kelýi ábden múmkin. Mıdy basqa arnaǵa aýystyrǵanda, basqasha oılar, jańa múmkindikter ashyla bastaıdy.
Ótkenge saıahat. Eski álbomdardy aqtaryp, sýret qaraý bolmasa ata-anańyzdan kishkene kúnińizdegi estelikterdi suraý da paıdaly eken. Bala kezdegi armandaryńyzdy eske túsirip, jan-jaǵyńyzǵa balanyń kózimen qarap kórińiz. Múmkin, bala qıalyńyzda oryndalmaı qalǵan keıbir armandardy oryndaıtyn ýaqyt kelgen shyǵar.
Ózińizben nıettes, pikirles adamdar izdeńiz. Ortaq qyzyǵýshylyqtaryńyz bar orta qalyptastyryńyz. Bul sizdiń tájirıbe almasyp, damýyńyzǵa jaqsy áser etedi. Ózińizben nıettes adamdardyń pikirin bilip, jańa oıdan shabyt alýǵa da septigin zor.
Jetistikterińizge qýana bilińiz. Buǵan deıin sátti, ózińizdiń oıyńyzdan shyqqan isińiz, jumysyńyz bolsa, sony qaıtadan bir qarap shyǵyńyz, sol kezdegi qýanyshty sátińizdi eske túsirińiz. Týǵan-týysyńyz, áriptesterińiz ben dostaryńyz sizdiń qandaı qasıetterińizdi joǵary baǵalap, qurmetteıtinine mán berińiz. Sol áreketterińizdi maqtan tutyńyz. Bul da - shabytty eseleýdiń utymdy joly. Shabyt tappaı, sátsizdikten jolyńyz bolmaı júrse, osy keńesterge qulaq túrip, iske kirisińiz!