Tumaýdyń aldyn alý sharalary
Qazaqstanda 15 qyrkúıek kúni tumaýǵa qarsy vaksınalaý bastalady. Bul týraly QR Densaýlyq saqtaý birinshi vıse-mınıstri Marat Shoranov aıtty, dep habarlaıdy Almaty-akshamy.kz QazAqparat saıtyna silteme jasap.
«Jaqyndap qalǵan JRVI, ıaǵnı tumaý maýsymyna aıryqsha toqtalyp ótkim keledi. Bıyl búdjet qarajaty esebinen Reseıde shyǵarylǵan «Grıppol+» vaksınasynyń 2,5 mln dozasy satyp alyndy. Vaksına quramynda aldaǵy maýsymǵa qarsy shtamm bar. Bul respýblıkanyń jalpy turǵyndarynyń 13 paıyzyn qamtýǵa múmkindik beredi. Dúnıejúzilik densaýlyq saqtaý uıymynyń usynysy – 10 paıyz. JRVI men tumaýǵa qarsy vaksınasıa 15 qyrkúıekte bastalady», - dedi ol Ortalyq komýnıkasıalar qyzmetindegi baspasóz máslıhatynda.
Birinshi vıse-mınıstrdiń atap ótýinshe, osyǵan oraı elimizdiń Bas memlekettik sanıtar dárigeriniń qaýlysy qabyldanǵan.
«Memlekettik búdjet qarajaty esebinen halyqtyń eń álsiz toby vaksınalanatyndyǵyn atap ótkim keledi. Olar: medısına qyzmetkerleri, medısınalyq uıymdarda dıspanserlik esepte turǵan balalar, jetim balalar jáne ata-anasynyń qamqorlyǵynsyz qalǵan balalar jáne basqalary. Buǵan qosa, vaksınalaý jumys berýshilerdiń jáne halyqtyń jeke qarajaty esebinen de júrgiziledi», - dedi Marat Shoranov.
Onyń aıtýynsha, reseılik vaksınadan bólek Qazaqstan aýmaǵynda taǵy 3 óndirýshiniń 4 vaksınasy tirkelgen. Atap aıtqanda, Sanofı-Paster (Fransıa) óndirgen «Vaksıgrıp Tetra», Inflúvak (Nıderlandy) men Sınovak Bıotek (Kıtaı) kompanıalary óndirgen vaksınalardy da alýǵa bolady.