İİM-de ekinshi ret ótkizilgen “Sert” respýblıkalyq detektıvtik janrdaǵy ádebı shyǵarmalar baıqaýynyń jeńimpazdary marapattaldy.
Qalamgerler báıgesiniń negizgi maqsaty – ishki ister organdary qyzmetkerleriniń qıyn da kúrdeli qyzmetin halyqqa jan-jaqty ashyp kórsetý. Elimizde detektıv janrynyń negizin qalaǵan jazýshylar Dmıtrıı Snegın, Qalmuhan Isabaev, Amantaı Baıtanaev jáne Kemel Toqaev. Olardyń shytyrman sújetteri áli kúnge deıin oqyrmandardyń jadynda, dep habarlaıdy
Baıqaýǵa ishki ister organdarynyń ardagerleri, zańgerler, kásibı ádebıetshiler qatysyp, 50-ge jýyq shyǵarma joldady. Olardyń eńbekterine esimderi elge tanymal otandyq jazýshylar, aqyndar men ádebıetshiler baǵa berdi. “Qanatty qalam” nomınasıasyn “S moıh slov zapısano verno” shyǵarmasynyń avtory Vladımır Bychkov, “Sóz sardary” nomınasıasyn “Amanat” shyǵarmasynyń avtory Aınur Sembaeva, “Shytyrman oqıǵa sheberi” nomınasıasyn “Sabyr ız ýboınogo otdela” shyǵarmasynyń avtory Saıa Isabaı, “Qarymdy qalamger” nomınasıasyn “Nabat” shyǵarmasynyń avtory Tóken Áljantegi ıelendi.
Úshinshi oryndy “Grajdanın nachalnık” shyǵarmasynyń avtory Dıhan Baımuhambetov ıelendi.
Ekinshi oryndy “Sen búgin erekshe ádemisiń” shyǵarmasynyń avtory Jadyra Shamuratova qanjyǵalady.
Birinshi oryndy “Kıllerdiń qateligi” týyndysynyń avtory Anarbek Muhtar aldy.
“Sert” baıqaýynyń bas júldesi “Fartovyı” týyndysynyń avtory Bekbolat Sarbasovqa buıyrdy.
Shyǵarmada ol polısıada jumys istegen kezinde ózi kýá bolǵan oqıǵalardy sıpattaıdy. İshki ister mınıstri Erjan Sadenov jeńimpazdardy quttyqtap, alda ótkiziletin baıqaýlarǵa qatysýshylar qatarynyń artatyndyǵyna senim bildirdi.
Esterińizge sala keteıik, “Sert” respýblıkalyq detektıvtik ádebı shyǵarmalar baıqaýyn el tarıhynda alǵash ret İshki ister mınıstrligi 2021 jyly ótkizgen bolatyn. Onyń qorytyndysy boıynsha qazirgi jazýshylardyń detektıv janryndaǵy shyǵarmalary bar eki tomdyq jınaq jaryqqa shyqty.