Iordanıanyń Amman qalasynda ótip jatqan bokstan Azıa chempıonatynda Qazaqstannan Serik Temirjanov alǵashqy bolyp rıngke shyqty, dep habarlaıdy Almaty-akshamy.kz Inform.kz-ke silteme jasap.
Qazaqstandyq boksshy 57 kelige deıin salmaqta túrkmenstandyq Ihlaz Gylychjanovpen judyryqtasty.
Úsh raýnd boıy jekpe-jek S.Temirjanovtyń basymdylyǵymen ótip, tóreshiler bir aýyzdan jeńisti qazaqstandyq sportshyǵa berdi.
Serik ótken jyly Serbıa astanasy Belgradta ótken álem chempıonatynda kúmis júldeger atanǵan edi. Ol – sondaı-aq jastar arasynda Azıa chempıony.
Búgin sondaı-aq kúndizgi sesıada 63,5 kelige deıingi salmaqta Sanatáli Tóltaev ózbekstandyq Rýslan Abdýllaevpen kezdesedi.
Keshki sesıada Tokıo olımpıadasynyń qola júldegeri Sáken Bıbosynov 51 kelige deıingi salmaqta úndistandyq Sparsh Kýmarmen sheberlik baıqasady.