E-commerce, qurylys, azyq-túlik, medısınalyq nysandar jáne farmasevtıka – Beıjińde 2023 jylǵy 16 tamyzda Premer-Mınıstrdiń orynbasary – saýda jáne ıntegrasıa mınıstri Serik Jumanǵarın osy baǵyttar boıynsha bıznes alyptarymen kezdesýler ótkizdi, dep habarlaıdy Almaty-akshamy.kz.
Birinshi kezdesý Jingdong Group (JD Group) korporasıasynyń vıse-prezıdenti Larrı Lımen ótti. Ótken jyly kompanıa Global Fortune 500 álemdik reıtıńinde 46-orynǵa ıe boldy. Internet alańda JD.com Amazon jáne Alibaba-men birge álemdegi eń tanymal jáne eń alpaýyttardyń biri bolyp tabylady.
Serik Jumanǵarın kezdesýde elektrondyq komersıa álemdik saýdanyń bolashaǵy ekenin atap ótti. «Bizde 40 jasqa tolmaǵan adamdardyń 85%-dan astamy búginde zattardy onlaın satyp alatyny týraly zertteýler bar. Qazaqstanda elektrondyq saýdanyń úlesi bólshek ishki saýdanyń shamamen 13%-dy quraıdy, 20%-ǵa deıin ulǵaıtýdy josparlap otyrmyz. JD.com bıznesti júrgizýdi jeńildetýge yqpal etedi, shaǵyn jáne orta kásiporyndardyń, tutynýshylardyń múmkindikterin keńeıtedi. Bul biz úshin óte qyzyqty, shaǵyn jáne orta bızneske sıfrlyq ekonomıkanyń artyqshylyqtaryn paıdalanýǵa kómektesý bizdiń jumysymyzdyń quramdas bólikteriniń biri», — dedi vıse-premer. Óz kezeginde Larrı Lı qazaqstandyq un men keptirilgen túıe súti suranysqa ıe ekenin jáne JD.com saıtynda belsendi saýdalanatynyn atap ótti.
Kezdesý qorytyndysy boıynsha taraptar «Qazpochta» AQ ókilderimen logıstıka men taýarlardy jetkizý júıesin qurý boıynsha kelissózderdi jalǵastyrýǵa kelisti. CITIC Group – qarjy-banktik qyzmetpen, saqtandyrýmen, ekonomıkanyń ónerkásiptik jáne qurylys sektorlaryna ınvestısıalaýmen, energetıkamen, mıneraldy resýrstardy ıgerýmen, mashına jasaýmen, kólik jáne telekomýnıkasıamen, jyljymaıtyn múlikpen aınalysatyn iri memlekettik konglomerat. Kezdesýde taraptar Qazaqstandaǵy aýyl sharýashylyǵyna ınvestısıa quıý múmkindikterin talqylady. Tao Ian atap ótkendeı, CITIC konglomeraty qazaqstandyq mal ósirý qaýymdastyǵymen tyǵyz baılanysta.
Qazaqstannyń vıse-premeri CITIC CONSTRUCTION prezıdentine aýyl sharýashylyǵyna qatysty ınvestısıalardyń birneshe baǵytyn qaraýdy usyndy.
«Qazaqstan aýmaǵynda teri men júndi qaıta óńdeý, sút, qus ósirý óndiristeri jetispeıdi. Osy salalarǵa, sýarý jobalaryna ınvestısıa salý múmkindigin qarastyrýdy usynamyn. QR Úkimeti jobalardy sátti iske asyrýǵa járdemdesýge daıyn, óıtkeni CITIC Group Qazaqstannyń senimdi ınvestısıalyq seriktesi», — dedi Serik Jumanǵarın.