Almatyda «Sergek» kameralary arqyly boryshkerlerdi anyqtaý reıdteri júrýde
Reıdti Almaty qalasy boıynsha Memlekettik kirister departamenti jeke sot oryndaýshylar palatasy, Ádilet departamenti jáne jol polısıasy qyzmetkerlerimen birlesip júrgizýde, dep habarlaıdy Almaty-akshamy.kz QazAqparatqa silteme jasap.
Búgin ótken reıdte «Sergek» kamerasymen 534 myń teńgege bereshegi bar NISSAN PATROL markaly avtokólik tirkeldi. Bul avtokólik tabylyp, aıyppul turaǵyna qoıyldy. Qalalyq Memlekettik kirister departamentiniń málimetinshe, reıdter aǵymdaǵy jyldyń sońyna deıin jalǵasady.
Búginde Almaty qalasy boıynsha jeke tulǵalardyń kólik quraldaryna salynatyn salyq beresheginiń jalpy somasy – 3,6 mlrd. teńge. Boryshkerler sany - 40 541. Olardyń bereshegin óndirip alý týraly buıryqtar shyǵaryldy jáne májbúrli túrde óndirip alý úshin atqarýshylyq is júrgizý organdaryna (Ádilet departamenti jáne jeke sot oryndaýshylarynyń palatasyna) berildi.
Aıtý kerek, boryshkerler áleýmettik tólemder nemese járdemaqylar, bilim berý depozıtterin alý úshin qajetti shottardan basqa shottar asha almaıdy. Sondaı-aq, salyq mindettemelerin ótemegen jaǵdaıda zańnamada belgilengen merzimde ósimpul esepteledi. Salyqtardy E-Salyq Azamat mobıldi qosymshasy, Egov portaly arqyly, Qazposhta bólimshelerinde, sondaı-aq, Ekinshi deńgeıdegi bankterdiń mobıldi qosymshasy arqyly tóleýge bolady.
Almaty qalasy boıynsha Memlekettik kirister departamenti qala turǵyndaryn ýaqytyly salyq tóleýge shaqyrady.