Almaty qalasynda Qazaq ulttyq qyzdar pedagogıkalyq ýnıversıtetinde kúrdeli jóndeýden ótken ǵylymı kitaphananyń saltanatty ashylý rásimi ótti.
Ulttyq bilim men ǵylym salasyna orasan zor úles qosqan ǵalym, pedagog Seraly Qanıevtiń atyna berilgen bul kitaphana tek bilim berý orny ǵana emes, zaman talabyna saı mádenı ortalyqqa aınalmaq.
Ashylý saltanatyna QR Ǵylym jáne joǵary bilim mınıstri Saıasat Nurbek, Almaty qalasynyń ákimi Erbolat Dosaev, Seraly Qanıevtiń týystary men ýnıversıtet ardagerleri qatysty. Almaty ákimi Erbolat Dosaev atap ótkendeı, bul kitaphana – tek kitap qoımasy emes, bilim men mádenıettiń oshaǵy. Onyń aıtýynsha, kitaphana joǵary halyqaralyq standarttarǵa saı jasalǵan, al Seraly Qanıevtiń esimin ıelenýi – ýnıversıtet úshin úlken mártebe.
«Búgingi stýdentterge Seraly aǵamyzdyń jolyn ustanyp, bilimge adaldyq tanytýyna tilektespin», – dedi ákim.
Mınıstr Saıasat Nurbek te bilim mekemelerinde kitaphanalardyń orny erekshe ekendigin atap ótip, kitap oqý men jazý mádenıetiniń qundy ekenine toqtaldy.
«Qazirgi zamanda kitaphanalar bilim alý ǵana emes, úlken áleýmettik ortalyqqa aınalýy tıis. Mundaı kitaphanalardyń bolýy oqý mádenıetin arttyrýǵa septigin tıgizedi», – dedi mınıstr.
Seraly Qanıuly – elimizdiń bilim jáne ǵylym salasynda tanymal tulǵa. Ol fızıka-matematıka ǵylymdarynyń kandıdaty, Qazaq SSR aǵartý isiniń úzdigi, eńbek ardageri, KSRO Joǵarǵy mektebiniń úzdigi atanǵan. 40 jylǵa jýyq qyzmetinde Seraly Qanıev kóptegen stýdentterge bilim berip, ǵylymı eńbekter jazýmen qatar qazaq tilindegi matematıka oqýlyqtaryn aýdarýǵa jáne jazýǵa atsalysty.
Jańa kitaphana qazirgi zamanǵy tehnologıalarmen jabdyqtalǵan jáne stýdentter, oqytýshylar, zertteýshiler úshin keńinen qoljetimdi. Munda ǵylymı qorlarmen jumys jasaý, zertteý júrgizý úshin barlyq jaǵdaı qarastyrylǵan. Ashylý rásiminde ustaz Seraly Qanıevtiń ómiri men qyzmeti jaıly beınefılm kórsetilip, ardager ustazdar onyń shákirtteri men izbasarlaryna qaldyrǵan murasy týraly estelikterin bólisti.