Almatydaǵy №1 troleıbýs parki óziniń 80 jyldyq mereıtoıyn atap ótti. Saltanatty jıynǵa qala ákiminiń orynbasary Asqar Ámrın qatysyp, qala basshysynyń quttyqtaýyn jetkizdi. Almatynyń damýyna aıryqsha úles qosyp kele jatqan bul qoǵamdyq kólik túri áli kúnge deıin qalalyqtardyń súıispenshiligine bólenip otyr. Mereıtoı aıasynda eńbek ardagerleri men maıtalman mamandarǵa zor eńbekteri úshin marapattar tabystaldy.
Osy jyldar ishinde troleıbýs qalalyqtar úshin jaıly ári qaýipsiz kólik retinde senimge ıe boldy. Búgingi kúni Qazaqstanda troleıbýs jelisi jumys isteıtin jalǵyz qala – Almaty. Qala turǵyndary bul kóliktiń qyzmetine rızashylyq bildiredi. Óıtkeni №1 park qalanyń qaq ortasynda ornalasqandyqtan, onyń «ómiri» turǵyndardyń kóz aldynda ótip jatyr. Áýezov kóshesi, №64 mekenjaıynan tańǵy 5-6-da jumysyn bastaıtyn temir tulparlar keshki 24:00-de ǵana ornyna oralady. Tórt mezgilde de jumysyn toqtatpaı, senimdi túrde qyzmet etedi.
Troleıbýs parkiniń aýmaǵy 4 gektardy quraıdy, onda 293 júrgizýshi jumys isteıdi, onyń ishinde 67-i – áıelder. Kúnine 130 myńǵa jýyq adamdy tasymaldaıtyn troleıbýstar qazir 273 km jelide 9 baǵyt boıynsha jumys istep tur. 2012 jyly parkte 90 troleıbýs bolsa, onyń ekeýi oqý maqsatynda paıdalanyldy. Jaqynda 100 jańa Yutong troleıbýsy jelige qosyldy. Osy kúzde taǵy 100 jańa troleıbýs, jyl sońyna deıin 112 jańa troleıbýs satyp alynady. Osylaısha, 2025 jylǵa qaraı parktegi barlyq kólik tolyq jańartylatyn bolady.
Park aýmaǵynda jóndeýdi nemese tehnıkalyq tekserýdi qajet etetin troleıbýstarǵa arnalǵan arnaıy bokstar men sheberhanalar bar. «Almatyelektrotrans» basshysy Aleksandr Beısembıevtiń aıtýynsha, troleıbýstar megapolıstiń mańyzdy tarıhynyń bir bóligi jáne ekologıalyq taza kólik túri. Aldaǵy jyly parkte kúrdeli jóndeý jumystary bastalady. Kabelderdi jańartý jumystary da bastalyp ketti, olardyń qyzmet etý merzimi 50 jylǵa deıin jetedi.
Almatyda troleıbýstardy paıdalaný týraly sheshim 1941 jyldyń 12 maýsymynda qabyldandy. Alǵashqy troleıbýstar Iaroslavl zaýytynan ákelindi. 1944 jyldyń 1 mamyrynda Almatyda №1 troleıbýs Gogol kóshesimen júrip ótip, troleıbýs dáýiriniń bastaýy boldy.
Troleıbýstardyń gúldený kezeńi 1970-1980 jyldarǵa sáıkes keldi. 1982 jyly marshrýttardyń uzyndyǵy 211 km-ge jetip, qaladaǵy jańa yqsham aýdandar men áýejaıǵa deıin júre bastady. Alaıda 1990 jyldardyń basynda troleıbýs qyzmeti qıyndyqtarǵa tap boldy, qosalqy bólshekter men júrgizýshiler jetispeýshiligi baıqaldy. Soǵan qaramastan, Almatyda troleıbýs jelisi jumysyn jalǵastyryp keledi.
Troleıbýs júrgizýshilerin daıarlaý prosesinde ózgerister engizildi. Endi «Tb» sanatyna 23 jastan bastap bir jyldyq «D1» kýrsyn támamdaǵandar qabyldana bastady. Bul júrgizýshilerdi jumysqa tartý jáne kadr tapshylyǵyn sheshýge baǵyttalǵan qadam.
Búgingi kúni troleıbýstar senimdi, qysta jyly, jazda kondısıonerleri bar zamanaýı kólik bolyp tabylady. Júrgizýshilerdiń jalaqysy 700–710 myń teńge, demalys pen medısınalyq qyzmetter tolyq qamtamasyz etiledi. Sonymen qatar, troleıbýs júrgizýshileri arasynda áýletimen jumys isteıtin otbasylar da bar. Júıedegi eski troleıbýstar 12 jyldan beri qyzmet atqaryp keledi.
Qalamyzdaǵy troleıbýstar zamanaýı jabdyqtarmen qamtylǵan: telefondardy zarádtaýǵa arnalǵan USB qosqyshtary, kondısıoner, beınebaqylaý, jáne borttyq jazǵyshtar bar.
