Alataý aýdanynda “Taza Qazaqstan” baǵdarlamasynyń «Almaty – bizdiń ortaq úıimiz» naýqany aıasynda mádenıet qaıratkerleri men qala turǵyndary tazalyq jumystaryna atsalysty.
Senbilik Momyshuly men Móńke bı kósheleriniń qıylysyndaǵy saıabaqta ótkizildi. Alataý aýdany ákimdigi Kóriktendirý bóliminiń bas mamany Madıar Abýev is-shara aıasynda oryndyqtar syrlanyp, saıabaq jáne fýtbol alańynyń aýmaǵy qoqystan tazalanǵanyn atap ótti.
- «Almaty – bizdiń ortaq úıimiz» naýqany óz jalǵasyn taýyp jatyr. Búgingi is-sharaǵa Mádenıet basqarmasynyń, Sport basqarmasynyń jáne Alataý aýdany ákimdiginiń qyzmetkerleri, sondaı-aq 3 merdiger mekeme jumysshylary kómegin berýde. Jalpy tazalyq jumystarynan bólek jolǵa shyǵyp turǵan aǵashtardyń butaqtaryn kesý jumystary da júrgizilýde, - dedi ol.
Al QR Eńbek sińirgen qaıratkeri Qaragóz Súleımenova qala turǵyndary arasynda tazalyq mádenıetin qalyptastyrýdyń mańyzdylyǵyna toqtaldy.
- “Taza Qazaqstan” naýqany eki jyldaı ótip jatyr. Bul óte mańyzdy másele. Biz turǵan jerimizge, ótip júrgen jolymyzǵa janashyrlyqpen qaramasaq, Almatydaı keremet qalamyz qalaı gúldeıdi. Osyndaı bastamalar arqyly biz ósimizdi ǵana emes, balalarymyzdy da tárbıeleımiz. Bizdiń ishki mádenıetimiz bıik bolýy kerek, - dedi Qaragóz Súleımenova.
Tazalyq jumystaryna atsalysqan Alataý dástúrli óner teatrynyń ártisi Aıaýlym Qunanbaı qalanyń tazalyǵy ár azamattyń paryzy ekenin aıtty.
- Alataý dástúrli óner teatrynyń ujymy bolyp Móńke bı kóshesindegi saıabaqqa kelip qaldyq. Osyndaı is-sharalar arqyly biz qalamyzdyń taza bolýyna úles qosamyz. Júrgen jerimizdi taza ustaý, ony lastamaý - árbirimizdiń paryzymyz dep oılaımyn, - dedi Aıaýlym Qunanbaı.