Qazaqstan Prezıdenti Qasym-Jomart Toqaevtyń Ulttyq quryltaı otyrysyndaǵy baıandamasy mańyzdy jáne aýqymdy máselelerge arnaldy. Memleket basshysy salyq reformasynan bastap birtutas ýaqyt beldeýine deıingi taqyryptardy qozǵap, sonymen qatar mádenıet pen din máselelerine erekshe nazar aýdardy.
Prezıdent Qasym-Jomart Toqaev Qazaqstandaǵy din bostandyǵynyń kepildendirilgenin, biraq tártipsizdiktiń jáne destrýktıvti dinı aǵymdardyń taralýyna jol berilmeıtinin atap ótti. Majılıs depýtaty Ermurat Bapı, Quryltaı músheleri Danıa Qydyrbaeva men Oljas Súleımenniń pikirlerine toqtala otyryp, Prezıdent ásirese sport salasynda taralyp jatqan zıandy dinı aǵymdarǵa qarsy kúsh-jiger jumsaý qajettigin málimdedi. Memleket basshysy elimizdegi dinı ahýaldyń turaqtylyǵyn saqtaý úshin osy baǵyttaǵy jumysty kúsheıtý mańyzdy ekendigin eskertti.
Kasym-Jomart Kemelevıch ulttyq sáıkestikti nyǵaıtýdyń mańyzdylyǵyn taǵy da atap ótti. Ol úshin basty róldi qazaqtyń ejelgi mádenıeti men dástúrleri atqaratynyn aıtty. Prezıdent, sonymen qatar, Naýryz merekesiniń ulttyq mádenıetimizdegi orny erekshe ekenin atap ótip, ony jalǵastyrý jáne dáripteý qajet ekenin aıtty.
Prezıdent ulttyń ózindik ereksheligin bildiretin ulttyq kıimderdi qoldanýdyń mańyzdylyǵyn da atap ótti. Qasym-Jomart Toqaevtyń pikirinshe, «bet-júzdi jasyratyn qara kıimderden góri, ulttyq stıldegi kıimderdi kıý áldeqaıda durys». Ulttyq kıimder bizdiń etnıkalyq sáıkestigimizdi aıqyn kórsetedi jáne ony keńinen nasıhattaý kerek dep atap ótti.
Qasym-Jomart Toqaevtyń baıandamasynan Qazaqstanda ulttyq mádenıetti damytýdy, ulttyq sanany nyǵaıtýdy jáne destrýktıvti dinı aǵymdarǵa qarsy kúresti odan ári kúsheıtýdi kózdeıtin saıası baǵyttyń jalǵasyp otyrǵanyn baıqaýǵa bolady. Memleket basshysy ulttyq biregeılikti qorǵaý men saqtaý máselesinde naqty qadamdar jasap, qoǵamdy tártipke shaqyrýdy maqsat etýde, dep jazdy dintanýshy Ál-Farabı Bolatjan.