Megapolıske Qazaqstan Respýblıkasy Senatynyń birqatar depýtattary jumys saparymen keldi. Olar shahardyń ózekti máselelerin ortaǵa saldy.
Dostyq úıinde QR Parlamenti Senatynyń depýtattary qalalyq máslıhat depýtattarymen elimizde júrgizilip jatqan keshendi demokratıalyq reformalar men Qazaqstannyń saıası júıesin qaıta jańǵyrtýdy talqylady.
Kezdesý barysynda depýtattar Qazaqstan Respýblıkasy Prezıdentiniń «Ádiletti Qazaqstan: bárimiz jáne árqaısymyz úshin. Qazir jáne árdaıym» atty saılaýaldy baǵdarlamasyn iske asyrý jónindegi is-qımyl josparyna egjeı-tegjeıli toqtaldy. Jospar sheńberinde máslıhat tarapynan depýtattyq korpýstyń belsendi jáne ashyq jumysyn qamtamasyz etý úshin barlyq kúsh-jigerin jumsap, qala turǵyndarynyń suranystary men ýaqyt talaptaryn eskere otyryp, birqatar ınovasıalar engizetin bolady.
Máslıhat tóraǵasy Stanıslav Kankýrov, Memleket basshysynyń tapsyrmasyna sáıkes, memlekettik saıasatty iske asyrý, búdjet qarajatyn tıimdi jumsalýyn baqylaý jáne qalalyq baǵdarlamalardy oryndaýdy qamtamasyz etý, azamattardyń usynystaryn qarastyrý jáne problemalaryn sheshý, qalanyń júıelik problemalaryn joıý jóninde usynystar ázirleý, megapolısti odan ári damytý jóninde bastamalar daıyndaý máslıhat jumysyndaǵy basty basymdyqtar bolyp tabylatynyn atap ótti.
Sondaı-aq, is-shara barysynda Almaty qalasynyń birqatar ekonomıkalyq, áleýmettik jáne ekologıalyq problemalary talqylandy. Máslıhat depýtattary Senat depýtattaryna erekshe qajettilikteri bar adamdar úshin buqaralyq sportty damytý, dárilik preparattarǵa baǵany tómendetý, aqyl-esi kem balalarǵa múgedektik taǵaıyndaý tetigin qaıta qaraý, shaǵyn jáne orta bıznesti qoldaý baǵdarlamasy týraly máselelerdi sheshýde qoldaý kórsetý týraly ótinishpen júgindi.
Esterińizge sala keteıik, 2022 jylǵy 22 jeltoqsanda QR Parlamenti Senatynyń jalpy otyrysynda depýtattar QR «Aglomerasıalardy damytý týraly» zańyn, sondaı-aq oǵan ilespe túzetýler paketin qabyldap, Prezıdentke qol qoıýǵa joldaǵan bolatyn. Aǵymdaǵy jyldyń 1 qańtarynda Memleket basshysy Qasym-Jomart Toqaev «Aglomerasıalardy damytý týraly» zańǵa qol qoıdy. Osyǵan baılanysty depýtattar elimizdegi iri Almaty aglomerasıasyn damytý úshin Senat pen máslıhat depýtattarynyń kúsh-jigerin biriktirýdiń mańyzdylyǵyn atap ótti.
Taqyrypqa oraı
Nurtóre JÚSİP, QR Parlamenti Senatynyń depýtaty:
– Qazirgi tańda Senattyń da atqaratyn ókilettiligi kúsheıip keledi. Joǵarǵy palata ókilderi Almaty qalalyq máslıhaty depýtattarymen jolyǵyp, kóptegen áleýmettik, ekologıalyq, ekonomıkalyq máselelerdi ortaǵa saldy. Bul óte jaqsy bastama dep oılaımyz. Óıtkeni, qazir Parlamentte depýttardyń bastamashyldyǵymen zań jobasyn daıarlaý jaǵy kúsheıdi. Jaqynda ǵana Memleket basshysy «Aglomerasıa» týraly zańǵa qol qoıdy. Bul degenimiz, megapolıstiń qarqyn alýyna septesedi. Sonymen birge irgeles jatqan eldi-mekenniń jaǵdaıy, qarym-qatynas máselesi, ekologıa, oqý-aǵartý bári keshendi túrde josparlanatynynyń bir kórinisi. Iaǵnı, atalǵan problemalardy qarjylandyrý tetikteri taba otyryp, kóp uzatpaı sheshimi tabylady dep bilemiz. Almatylyqtardy tolǵandyrǵan oılardy jadymyzǵa toqyp, túrtip aldyq. Aldaǵy ýaqytta depýtattyq saýaldar, basqa da zań jobalarynda aıtylǵan usynys pen pikrilerdiń sheshý joldaryn qarastyramyz.
Dınar NÓKETAEVA, QR Parlamenti Senatynyń depýtaty:
– Konstıtýsıaǵa engen ózgertýler men tolyqtyrýlar nátıjesinde Parlamenttiń róli artty. Sonyń nátıjesinde azamattardyń quqyǵyn qoǵaý tásilderi jetildirildi. Halyqtyń el basqarý isine qatysý múmkindikteri keńeıdi. Ol ózgerister jańarýdyń basy ǵana. Saıası reformalaý odan ári jalǵasa beredi.
Senattyń atqaryp, el damýnyń órkendep ósý jolynda istep kele jatqan ilkimdi isteri jeterlik. Ózim de osy bir qyrýar sharýanyń bel ortasynda júrmin. Almaty biz úshin ystyq. Osydan týra 6 jyl buryn depýtat bolyp saılanǵan edim. Sol ýaqytta saılaýshylardyń qoldaýyn sezindim. Áli de sezinip, soǵan saı ister atqaryp kelemiz. Súıikti shaharymyz damýy kóz aldymyzda. Qoıan jylynda tatýlyq, yntymaq, birlik bolsyn!