Túzetýler Prezıdentke qol qoıýǵa jiberildi.
Parlament depýtattary Senatynyń jalpy otyrysynda Tuńǵysh Prezıdent kúnin memlekettik merekeler qatarynan alyp tastaýǵa baǵyttalǵan zańdy qabyldady, dep habarlaıdy Almaty-akshamy.kz QazAqparatqa silteme jasap.
Bul norma «Qazaqstan Respýblıkasynyń keıbir zańnamalyq aktilerine kınematografıa, mádenıet jáne merekeler máseleleri boıynsha ózgerister men tolyqtyrýlar engizý týraly» zań jobasynda qamtylǵan.
Osy oraıda «Qazaqstan Respýblıkasyndaǵy merekeler týraly» Zańǵa 25 qazan – Respýblıka kúni ulttyq mereke jáne 16 jeltoqsan – Táýelsizdik kúni memlekettik mereke bolyp belgilenetin ózgerister engizý qarastyrylǵan. Sondaı-aq 1 jeltoqsan – Tuńǵysh Prezıdent kúnin memlekettik merekeler tiziminen alyp tastaý usynysyna qoldaý jasaldy.
Bul qujatta «Kınematografıa týraly» jáne «Mádenıet týraly» Qazaqstan Respýblıkasynyń zańdaryna mynadaı tujyrymdamalyq túzetýler men jańashyldyqty kózdeıtin ózgerister men tolyqtyrýlar engizý usynylǵan:
- kınematografıa salasyn memlekettik qarjylyq qoldaý;
- kınematografıa salasynyń materıaldyq-tehnıkalyq bazasyn saqtaý men damytýdy júıelendirý jáne zańnamalyq reglamentteý;
- balalar anımasıalyq fılmderi men otbasymen kórýge arnalǵan fılmderdi qazaq tilinde dýblájdaýdy memlekettik qoldaý;
- kınematografıa salasynda memlekettik qarjylyq qoldaýdy alý úshin kınematografıalyq qyzmet sýbektileriniń sheńberin keńeıtý;
- Ulttyq kınony qoldaý memlekettik ortalyǵynyń janynan Ulttyq kınokomıssıa qurý mehanızmin jáne onyń qyzmet etýin zańnamalyq retteý;
- halyqaralyq arenalarda ulttyq fılmderdi ilgeriletýdi memlekettik qoldaý;
- ulttyq fılmderdi shyǵarýǵa bólinetin qarjyny: tarıhı, patrıottyq jáne ımıjdik fılmderge – 70 paıyz, al jeke kınojobalardy, onyń ishinde debúttik fılmderdi qosa qarjylandyrýǵa – 30 paıyz bólýdiń jańa tásilderin aıqyndaý;
- «Kınematografıa týraly» Qazaqstan Respýblıkasy zańynyń normalaryn iske asyrý kezinde biryńǵaı quqyq qoldaný tájirıbesin qamtamasyz etý úshin jańa túsinikter engizý.