25 qazan resmı túrde ulttyq mereke – Respýblıka kúni bolyp belgilenedi.
Senat depýtattary "Respýblıka kúnin qaıtarý týraly" zańdy qabyldady, dep habarlaıdy Almaty-akshamy.kz
«Qazaqstan Respýblıkasynyń keıbir zańnamalyq aktilerine kınematografıa jáne mádenıet máseleleri boıynsha ózgerister men tolyqtyrýlar engizý týraly» zań jobasy aıasynda memlekettik merekeler tizimine ózgeris engiziledi. Oǵan sáıkes, 25 qazan resmı túrde ulttyq mereke – Respýblıka kúni bolyp belgilenedi.
Al 1 jeltoqsan – Tuńǵysh Prezıdent kúnin memlekettik merekeler qatarynan alyp tastaý usynyldy. Bul kún Memlekettik rámizder kúni, Alǵys aıtý kúni jáne qoǵamdyq mańyzy bar ózge kúnder sekildi atalyp ótedi. Sáıkesinshe, qazaqstandyqtar 1 jeltoqsanda demalmaıdy.
Al 25 qazanda resmı túrde demalys bolady. Respýblıka boıynsha merekelik sharalar uıymdastyrylady. Al 16 jeltoqsan eske alý kúnine aınalady.
2009 jyly burynǵy Prezıdent Nursultan Nazarbaevtyń bastamasymen 25 qazan – Respýblıka kúni resmı merekeler tiziminen shyǵarylǵan bolatyn. Al Memleket basshysy Qasym-Jomart Toqaev 2022 jyly 16 maýsymda Ulttyq quryltaıdyń otyrysynda burynǵy merekeni qaıtarý qajettigin málimdedi. Sebebi dál sol kúni 1990 jyly Qazaqstannyń egemendigi týraly deklarasıa qabyldandy.
Respýblıka kúnin qaıtarý týraly zańǵa Prezıdent qol qoıýy kerek. Osydan keıin qujat zańdy kúshine enedi.