Senatorlar memlekettik bastamalardy Elbasymen kelisý qajettiligin joıýdy usynady. Bul norma búgin palatanyń jalpy otyrysynda senatorlar qaraǵan «Tuńǵysh Prezıdent - Elbasy týraly» Konstıtýsıalyq Zańda jazylǵan, dep habarlaıdy Almaty-akshamy.kz QazAqparatqa silteme jasap.
Búgin Senattyń jalpy otyrysynda «Qazaqstan Respýblıkasynyń keıbir konstıtýsıalyq zańdaryna ózgerister men tolyqtyrýlar engizý týraly» Qazaqstan Respýblıkasy Konstıtýsıalyq zań jobasyn, sondaı-aq «Qazaqstan Respýblıkasynyń keıbir zańnamalyq aktilerine ózgerister engizý týraly» zań jobasyn qarady.
Bul rette «Qazaqstan Respýblıkasyndaǵy saılaý týraly» Konstıtýsıalyq zańyna, Qazaqstan Respýblıkasynyń «Saıası partıalar týraly» Zańynda depýtattyq mandattardy bólý kezinde kvotany mindetti esepke alý týraly normany zańnamalyq bekitýge jáne áıelder men jastardan basqa, múgedektigi bar adamdar úshin kvota belgileı otyryp, kvota beriletin sanattarynyń tizbesin keńeıtý eskerilgen. Iaǵnı, depýtattardy Májiliske tirkegen kezde partıalyq tizimde úsh sanat ókilderiniń: áıelderdiń, jıyrma toǵyz jasqa tolmaǵan adamdardyń jáne múgedektigi bar adamdardyń sany tizimge engizilgen adamdardyń jalpy sanynyń keminde 30 paıyzyn quraýǵa tıis, bul kvota depýtattyq mandattardy bólý kezinde de saqtalýy tıis.
Budan bólek depýtattar «Qaýipsizdik Keńesi týraly» jáne «Qazaqstan halqy Assambleıasy týraly» Zańdarǵa buryn usynylǵan ózgerister men tolyqtyrýlardy talqylady. Túzetýlerde Elbasynyń Qaýipsizdik Keńesinde jáne Qazaqstan Halqy Assambleıasynda ómir boıy tóraǵalyq etý quqyǵynyń kúshin joıý kózdeledi.
Joǵarǵy Palata depýtattary májilismenderdiń buryn aıtylǵan barlyq ózgeristerin maquldady. Biraq, óz túzetýlerin usyna otyryp, zań jobasyn tómengi palataǵa qaıta qaraýǵa qaıtaryp otyr.
«Senatorlar zańnamaǵa engizilip otyrǵan memleketimizdiń Qaýipsizdik Keńesin, Qazaqstan Halqy Assambleıasyn Memleket basshysy óziniń qyzmetine sáıkes basqarýy tıis degen ózgeristerdi qoldady. Sonymen qatar zańdy talqylaý barysynda bir norma engizilip otyr. Ol – «Tuńǵysh Prezıdent týraly» zańnan memlekettiń ishki jáne syrtqy saıasatyna baılanysty bastamalardy Elbasymen kelisilýge tıis degen norma alyp tastalyp otyr. Sondyqtan da Senat zańnamaǵa engizilgen ózgeristerdi tujyrymdamaly túrde qoldap, bir ózgerispenen Májiliske qaıtaryp otyr»,- dep atap ótti senator Lázzat Súleımen.
Endi bul túzetýdi Májilis depýtattary qaraıdy jáne qabyldanǵan jaǵdaıda Zań jobasy Prezıdentke qol qoıýǵa jiberiledi.
Sonymen qatar Senat tóraǵasy Máýlen Áshimbaev búgin qaralǵan zań jobalary Memleket basshysynyń elimizdi jańartý baǵdaryn iske asyrýǵa arnalǵanyn atap ótti.
«Soǵan sáıkes, Májilistegi depýtattyq mandattardyń keminde 30 paıyzy kepildi túrde áıelderge, jastarǵa jáne múgedektigi bar adamdarǵa beriledi. Bul Parlamenttiń ókildi fýnksıalaryn kúsheıtedi, sondaı-aq onyń jumysyna barlyq mańyzdy áleýmettik toptardyń qatysýyna kepildik beredi. Mundaı qadam qabyldanatyn zańdardyń sapasyna áser etetini sózsiz. Múgedektigi bar adamdardy Májilis quramyna qosý Parlamenttiń ınklúzıvtiligin de arttyrady. Bul osy sanattaǵy azamattardy elimizdiń jalpy saıası ómirine belsendi jumyldyrýǵa múmkindik beredi. Sonymen qatar, qabyldanǵan normalarǵa sáıkes, Qazaqstan Respýblıkasynyń Prezıdenti halyq pen memlekettik bılik birliginiń nyshany ári kepili retinde Qazaqstan halqy Assambleıasy men Qaýipsizdik Keńesin basqarady», - dedi M.Áshimbaev.