9 mamyrda Abaı oblysynyń ákimi Berik Ýálı men oblystyq qorǵanys isteri jónindegi departamenttiń bastyǵy polkovnık Rýslan Omarov soǵys ardagerleri Ábdiǵalı Qaımoldın men Ivan Shevsovty quttyqtap bardy.
Jeńiske qosqan ólsheýsiz úlesi úshin ardagerlerge rızashylyǵyn bildirgen Berik Ýálı olarǵa memleket basshysynyń quttyqtaýyn jetkizdi.
Maıdangerlerge mereıtoılyq medaldar, bes mıllıon teńgeniń sertıfıkaty jáne oblys ákimdiginen arnaıy syılyǵy tabys etildi.
– Uly Jeńisti jaqyndatqan ardagerlerdiń bárine rızashylyǵymdy bildirgim keledi. Búgingi beıbit kúnimiz úshin sizderge myń alǵys, – dedi Berik Ýálı.
Qorǵanys mınıstri atynan ardagerlerge alǵys hattar men baǵaly syılyqtardy qorǵanys isteri jónindegi departament bastyǵy polkovnık Rýslan Omarov tabystady.
Al Ulttyq ulan 5511 áskerı bóliminiń áskerı orkestri soǵys jyldaryndaǵy áýenderdi oryndady.
Ábdiǵalı Qaımoldın 1921 jyly Semeı oblysynyń Abraly aýylynda dúnıege kelgen. Jıyrma jasynda óz erkimen maıdanǵa attandy. Ol Stalıngrad, 1-shi Ýkraına, 1-shi Belarýs jáne 3-shi Baltyq maıdandarynda shaıqasty. Qyzyl Juldyz, I dárejeli Otan soǵysy ordenderimen jáne "Jaýyngerlik erligi úshin" medalimen marapattalǵan.
Ivan Shevsov 1926 jyly dúnıege kelgen. 18 jasynda Qyzyl Armıa qataryna shaqyryldy. Eýropa elderin azat etýge qatysty. II dárejeli Otan soǵysy jáne Qyzyl Juldyz ordenderimen marapattalǵan.