Seıfýllın-Jansúgirov jolaıryǵyn iske qosý birqatar kóshelerdiń ótkizý qabiletin orta eseppen 15-20-ǵa arttyrýǵa múmkindik beredi
Almaty máslıhatynyń kezekti sesıasy barysynda qalalyq mobıldilik basqarmasynyń basshysy Saǵyndyq Telibaev depýtattardyń osy jolaıryǵyn iske qosýdyń áseri jáne kólik salasyndaǵy basqa da iri jobalar qurylystarynyń barysy týraly suraqtaryna jaýap berdi, dep habarlaıdy aqshamnews.kz
«Seıfýllın dańǵyly men Jansúgirov kóshesiniń qıylysynda jolaıryǵyn salý Seıfýllın dańǵylynda ótkizý qabiletin 15-20% – ǵa, Jansúgirov kóshesi boıynsha 15% - ǵa arttyrýǵa múmkindik beredi dep kútilýde», - dep atap ótti Saǵyndyq Telibaev.
Onyń aıtýynsha, búginde Saın, Tóle bı jáne Jubanov kóshelerin uzartý jalǵasýda. QMB-nyń basshysy bul jumystyń tıimdiligi qalanyń batys jáne soltústik-batys bólikterindegi keptelisterdi 15% - ǵa azaıtý ekenin atap ótti.
«Sonymen qatar, Saın kóshesi BAKADQA deıingi radıaldy jol bolyp tabylady, bul qalanyń soltústik-batys bóligin Úlken Almaty aınalma avtomobıl jolyna shyǵýmen qamtamasyz etedi. Al bul óz kezeginde qala qurylysy aýmaǵynan tys tranzıttik avtokóliktiń ótýi esebinen qalanyń kóshe-jol jelisinde kólik júktemesin azaıtady», - dedi ol.
Esterińizge sala keteıik, Seıfýllın-Jansúgirov jolaıryǵyndaǵy qozǵalys aǵymdaǵy jyldyń sońyna deıin ashylady dep josparlanýda. Búgingi tańda «Batys» jáne «Shyǵys» ótkelderinde rampalyq ýchaskeni, trotýarlardy ornatý, ınjenerlik jelilerdi qaıta qurý, sondaı-aq jer ústi jaıaý júrginshiler ótkelin salý boıynsha jumystar júrgizilýde.