Almaty qalasynda jaýyn-shashyn saldarynan sý basýdyń aldyn alý maqsatynda ál-Farabı dańǵylyndaǵy jerasty jaıaý júrginshiler ótkelinde sý burý jelilerin salý josparlanyp otyr. Bul týraly Almaty máslıhatynyń XXII sesıasy barysynda qalalyq ekologıa jáne qorshaǵan orta basqarmasy basshysynyń mindetin atqarýshy Mıras Gaısın málimdedi, dep habarlaıdy aqshamnews.kz
Spıkerdiń aıtýynsha, joba aıasynda ál-Farabı dańǵylynyń ońtústiginde, Kereńqulaq pen Esentaı ózenderiniń arasyndaǵy aýmaq qamtylady. Jobada sýdyń úlken kólemin eskere otyryp, aryq jelilerin rekonstrýksıalaý, sý aǵyzǵysh ornatý, oıyqtardy qaıta qurý jáne qoldanystaǵy sý burý jelilerin keńeıtý josparlanǵan.
Qazirgi ýaqytta basqarma tehnıkalyq tapsyrma daıyndady, al jobalaý-smetalyq qujattamany ázirleý osy jyly bastalady dep josparlanyp otyr.
Sonymen qatar, Alataý aýdanynyń «Tomırıs» shaǵyn aýdanyndaǵy Djıgıtovka ózeni toǵanynyń gıdrotehnıkalyq qurylystaryn qaıta jańartý máselesi de qozǵaldy.
«Jalpy, qala aýmaǵynda 40 gıdrotehnıkalyq qurylys bar, onyń 6-y Alataý aýdanynda ornalasqan jáne olardyń jaǵdaıy máz emes. Toǵandar kaskady 1960 jyldary salynǵan, sodan beri jóndeý jumystary júrgizilmegen. Jaýyn-shashynnyń kóp bolýy jaǵdaıynda gıdrotehnıkalyq qurylystardy shaıyp ketý qaýpi bar», - dedi Mıras Gaısın.
Bul máselelerdi sheshý úshin basqarma 2024 jyldyń 4-toqsanynda gıdrotehnıkalyq qurylystardy jańartýǵa jobalaý-smetalyq qujattamany ázirleýdi josparlap otyr. Jobada tozǵan gıdrotehnıkalyq qurylystar men kótergish gıdromehanıkalyq jabdyqtardy rekonstrýksıalaý, tirek qurylystaryn salý, zańsyz qurylystardy buzý, toǵandardy tazalaý jáne jaǵalaýdy nyǵaıtý, tazartý qurylystaryn ornatý jáne jasyl qordy jańartý josparlanǵan.