Seıfýllın dańǵylynyń Úlken Almaty kanalymen (ÚAK) qıylysyndaǵy kópirdi jóndeýge baılanysty Almaty qalalyq Mobıldilik basqarmasy BAQ ókilderine arnaıy baspasóz týryn uıymdastyrdy.
Túrksib aýdanynyń ákimi Baqytjan Aqjarov BAQ ókilderine «Almaty-1» temir jol beketin qala ortalyǵymen jalǵap, úzdiksiz qozǵalysty qamtamasyz etetin dańǵyldyń boıyndaǵy kópirde júrgizilip jatqan jumystardyń mánisin túsindirdi.
«Aýdan turǵyndary 80-jyldary salynǵan osy kópirdiń júrginshilerge qaýip týǵyzyp otyrǵanyn aıtyp, ákim bolǵaly úsh jyl ishinde áldeneshe ret shaǵymdandy. Keı tustaǵy qaptamalardyń qulap, basqyshtardyń úgitilip qalǵanyn kózimiz kórip otyr. PIK tóraǵalary da atalǵan kópirdiń qaterin eske salǵan. Aıtaıyn degenimiz, bul kópirdiń rettelýi qajettigi. Bizge osy kópirden kúndelikti ótetin júrginshilerdiń amandyǵy mańyzdy. Sol úshin de qalalyq Mobıldilik basqarmasyna ótinishimizdi joldap, kópir qurylysyn retteýdi suradyq. Onyń ústine, bıyl Seıfýllın dańǵylyna ortasha jóndeý jumystary júrmekshi. Osyny paıdalanyp, tóńiregimizdegi kópirdi retteý kezegi kelip tur», – dedi aýdan ákimi.
Áleýmettik jelilerde taraǵan tutas granıt-tastardyń joıylǵany jónindegi aqparattyń shyndyqqa janaspaıtynyn aıtqan profıldik basqarmanyń málimdeýinshe, kópirdiń tek apattyq qaptaý fragmenti ózgeredi. 1980 jyldan beri saqtalǵan sapaly granıt jabyny ornynda qalady. Seıfýllın kópirindegi granıt plıtalar tazartý úshin alynyp, bútin tastar ornyna qoıylady. Kópir salynǵannan beri jóndelmegen. Ár jyldary aǵymdaǵy jóndeý kezinde synǵan, tozǵan plıtalar qalpyna keltirilmek. Kópirdiń qaptamasynda eki túrli materıal: oń jaqta – granıtti tastar, sol jaqta, ıakı Seıfýllın dańǵylynyń júrý bóliginde – qalyńdyǵy 20 mm kesilgen granıt plıtalar qoldanylmaq.
Beti jyltyr, jaqsy saqtalǵan bútin granıtti tastar aýystyrylmaıdy. Tek olardy tazalap, tegisteý úshin alyp tastaıdy. Osydan soń olardy osy ýchaskede qaıta paıdalanyp, ornatady. Rasynda, baspaldaq jıekterindegi plıtalar arasynda ydyraǵany bar. Tirek qabyrǵalary men qurylymnyń ózindegi granıt plıtalardyń qabyrshaqtanǵany baıqalady. Álbette, bul jaǵdaıdyń jaıaý júrginshilerge qaýpi joq dep aıta almaısyń. Basqarma basshysy jóndeý jumysy barysynda bul plıtalardyń tazartylyp, bastapqy qalpyna keltiriletinin atap aıtty.
Seıfýllın dańǵylynyń qozǵalys bóligin qaptaýǵa qoldanylǵan qalyńdyǵy 20 mm kesilgen jalpaq granıt plıtalarynda aqaý joq emes, úgitilgeni kórinip tur. Demek, bul plıtalar osyǵan uqsas plıtalarǵa aýystyrylady. Bólshektelgen jáne aýystyrylǵan plıtalardyń kólemi 25 paıyzdan aspaıdy.
Áleýmettik jelide taraǵan jańa materıaldardyń sapasyzdyǵy jónindegi áńgime de shyndyqqa janasa qoımaıdy. Ornatylatyn granıt plıtalarynda memlekettik tehnıkalyq retteý júıesiniń derekter tiziliminde tirkelgen sáıkestik sertıfıkaty bar. Osy sertıfıkat tıisti túrde sáıkestendirilgen árleý plıtalary – granıtten («Jeltaý», «Maıkól» jáne «Jalǵyz-5» ken oryndary) jasalǵanyn rastaıdy. Bul jumystardy shildeniń sońyna deıin aıaqtaý josparlanýda. Kópirdi jóndeý jaıaý júrginshilerdiń qaýipsizdigin qamtamasyz etý maqsatynda Túrksib aýdany turǵyndarynyń ótinishteri boıynsha júrgizilip jatqanyn aıta ketken jón.
«Bizdiń basqarma aǵymdaǵy jyly Seıfýllın dańǵylynyń 5,7 shaqyrymyna ortasha jóndeý jumystaryn qolǵa aldy. Osyǵan deıin mundaı jumys 2010 jyly atqarylǵan. Tıptik talapqa saı, ár 5 jyl saıyn osyndaı jumys júrgizilýi tıis. Asfált-beton jabynynyń joǵary betine polımer-shma salynady. Muny Almatyda birinshi ret qoldanyp otyrmyz. Osyǵan deıin sheven-mastıkalyq beton salynyp kelgen. Munyń ózi qalamyzdyń magıstraldy joldarynda avtokólikterdiń kóbeıýine baılanysty bolyp otyr», – dedi Almaty qalalyq Mobıldilik basqarmasynyń basshysy Saǵyndyq Telbaev.
