«Qazaq Air» áýe kompanıasyn satý týraly jańa konkýrs ótip jatyr.
Bul týraly «Samuryq-Qazyna» AQ damý jáne jekeshelendirý jónindegi basqarýshy dırektory Saltanat Sátjan málim etti, dep habarlaıdy almaty-akshamy.kz.
«Bizge „Qazaq Air áýe kompanıasy satý týraly konkýrs nege ótpeı qaldy? Nege qaıtadan konkýrs jarıalandy?“ degen suraqtar jıi túsedi. Jańadan jarıalanǵan konkýrstyń qandaı aıyrmashylyǵy bar? Biz byltyr tamyzda „Qazaq Air“ áýe kompanıasyn satý týraly 2 kezeńnen turatyn ashyq konkýrs jarıaladyq. Degenmen konkýrs talaptaryna saı keletin ótinish túsken joq», - dedi Saltanat Sátjan «Samuryq-Qazyna» AQ qoǵamdyq keńes otyrysynda.
Onyń aıtýynsha, halyqaralyq ınvestorlar atalǵan áýe kompanıasyna qyzyǵýshylyq tanytqan.
«Sodan keıin konkýrstyń jańa talaptaryn ázirledik. Konkýrs qazir júrip jatyr. Jańa baıqaýdyń artyqshylyǵy - Qazaq Air áýe kompanıasynyń qaryzyn óteý merzimi ózgerdi. Búginde kompanıanyń 38 mlrd teńge qaryzy bar. Qarjyny áýe kompanıasy 5 ushaq alý úshin ulttyq qordan alǵan», - deıdi ol.
Sondaı-aq «Samuryq-Qazyna» AQ ókili qaryzdy 2044 jylǵa deıin óteý kerektigin aıtty.
Konkýrs 29 qańtarǵa deıin jalǵasady, oǵan kez kelgen ınvestor qatysa alady.