Almatylyq «Qaırat» fýtbol klýby Birikken Arab Ámirlikteriniń Abý-Dabı qalasynda ótetin oqý-jattyǵý jıynyna qatysatyn oıynshylar tizimin jarıalady, dep habarlaıdy Aqshamnews.kz.
Komanda bas bapker Rafael Ýrazbahtınniń jetekshiligimen BAÁ-ge 25 fýtbolshymen attanady. Klýbtyń málimetinshe, Dastan Satpaev, Oljas Baıbek jáne Azamat Týıaqbaev ázirge sapqa qosylmaǵan – olar ońaltý kezeńinen ótip jatyr.
Abý-Dabıge baratyn quram
Qaqpashylar: Temirlan Anarbekov, Sherhan Qalmyrza, Danıla Bých.
Qorǵaýshylar: Lýısh Mata, Aleksandr Martynovıch, Egor Sorokın, Erkin Tapalov, Aleksandr Mrynskıı, Aleksandr Shırobokov, Lev Kýrgın, Sultan Askarov, Ámirbek Bazarbaev.
Jartylaı qorǵaýshylar: Dan Gleızer, Valerıı Gromyko, Damır Qasabýlat, Ádilet Sadyqbekov, Iaakko Oksanen, Iýg Stanoev, Muhamedálı Ábish, Ismaıl Bekbolat.
Shabýylshylar: Jorjıno, Edmılson, Rıkardıno, Ramazan Baǵdat, Mansur Birqurmanov.
Aıta keteıik, tizimge almatylyqtardyń jańa oıynshysy – Fınlándıa quramasynyń jartylaı qorǵaýshysy Iaakko Oksanen de engizilgen.
Klýb buǵan deıin 4 qańtar kúni tańerteń komanda BAÁ-ge ushatynyn habarlaǵan. Jıyn 15 qańtarǵa deıin jalǵasady. Bul kezeńdegi basty mindet – maýsymǵa qajetti fızıkalyq babqa kelý jáne resmı kezdesýlerge tyńǵylyqty daıyndalý.
Oqý-jattyǵý jıyny aıasynda «Qaırat» eki joldastyq mach ótkizedi:
-
9 qańtar – ázerbaıjandyq «Nefchıge» qarsy;
-
14 qańtar – horvatıalyq «Varajdınge» qarsy.
Al odan keıin almatylyq klýbty Chempıondar lıgasynyń jalpy kezeńindegi sońǵy eki oıyny kútedi:
-
20 qańtar – belgıalyq «Brúggege» qarsy;
-
28-inen 29 qańtarǵa qaraǵan túni – londondyq «Arsenalmen» kezdesý.
Týrnırdegi jaǵdaı
Qazir «Qaırat» týrnır kestesinde 36-orynda tur. Komandanyń qorjynynda kıprlik «Pafospen» bolǵan 0:0 teń nátıjeden keıingi 1 upaı bar. Buǵan deıin «Sportıng», «Real», «Inter», «Kopengagen» jáne «Olımpıakosqa» qarsy oıyndarda upaı ala almady.