Qazaqstan Jazushylar kítaphanasynda kórnektí ǵalym, abaıtanushy, qoǵam qaıratkerí Qaıym Mūhamedhanovtyń tuǵanyna 110 jyl toluyna oraı "Ūlt ruhanıyatynyń shamshyraǵy – Qaıym Mūhamedhanov" atty dóńgelek ústel óttí.
Jıynǵa "Qaıym Mūhamedhanov atyndaǵy Bílím jáne mádenıet ortalyǵy" dırektory, ǵalymnyń qyzy Dına Mūhamedhan, ádebıettanushylar men ǵalymdar, unıversıtet professorlary men studentter qatysty. Ís-shara barysynda tarıh ǵylymdarynyń kandıdaty Naılya Tajıkbaeva dara tūlǵanyń ómírí men eńbekteríne toqtalyp, ony dárípteudíń mańyzy orasan zor ekenín atap óttí. Sonymen qatar Qazaqstan Jazushylar kítaphanasyna Qaıym Mūhamedhanov turaly kítabyn tartu ettí. Al Halyqaralyq TÚRKSOI sarapshysy, ádebıettanushy-ǵalym Seríkqazy Qorabaı halqynyń ruhanı mádenıetíne qosqan úlesíne toqtaldy.
"Bıyl 5-shí qańtarda Alash ruhyn arqalap, Abaı amanatyn qorǵap, ūlt múddesí jolynda, bízdíń bolashaǵymyz jolynda janqıyarlyqpen kúresken írí tūlǵalarynyń bírí de bíregeıí, Qazaqstan Respublıkasy Memlekettík syılyǵynyń laureaty, Abaıtanu ǵylymynyń negízín qalaushylardyń bírí, Shákárímtanu negízín qalaǵan professor Qaıym Mūhamedhanovtyń tuǵanyna 110 jyl toldy. Ol – qazaq ádebıetíne, ūltymyzdyń kórkemdík-estetıkalyq álemíne teńdessíz úles qosyp, óz halqynyń ruhanı mádenıetí men oıyna jańa keńístík ashqan ǵalym. Basqasyn aıtpaǵanda, ūly Abaı mūrasy men Abaıdyń aqyndyq mektebín zerttep, nasıhattauy Qaıym Mūhamedhanovtyń ǵylymı úlken erlígí dep bílu kerek. Ǵalym ózíníń mūrattaryna adal boldy. 1951 jyly "Abaıdyń ádebı mektebín" zerttep jazǵan eńbegí úshín 25 jyl jazyqsyz sottalyp, zardap shekse de, mūqalmady", – dedí professor.
Jazushy-jurnalıst, Qaıym Mūhamedhanov turaly "Er qazaq" kítabynyń avtory Dáulet Seısenūly ómírín elíne qyzmet etuge arnaǵan tūlǵanyń boıyndaǵy asyl qasıetter men qaısar mínez qalaı qalyptasqanyn túsíndírdí.
"Qaıymnyń ákesí Mūhamedhannyń úıí – Abaı, Shákárím, keıín Mūhtar Áuezov, Alash arystary – Álıhan, Ahmet, Mírjaqyp qona jatyp, áńgíme-dúken qūratyn qasıettí qūthanasyna aınalǵan. Shákárím qajylyqtan oralǵan soń, osy úıde ayaldapty. Sonda Mūhamedhan boı túzep óse bastaǵan Qaıymǵa "Alash arystarynyń tízesínde otyryp ósken seníń jaman boluǵa haqyń joq" deıtín kórínedí. Aıtqandaı-aq, Qaıym jasynan ataly sózge, jaqsy ortaǵa úıír bolyp óstí. Solaısha aradaǵy 25 jas aıyrmashylyǵyna qaramastan, jas Mūhtar Áuezovtíń íní-dosyna aınaldy", – dedí Dáulet Seısenūly.
