Qazaqstanda otandyq farmasevtıka úlesin arttyrý maqsatynda tórt jańa zaýyt salynady, dep habarlaıdy Aqshamnews.kz tilshisi.
Premer-mınıstrdiń resmı aqparattyq resýrsynyń málimetinshe, Úkimet Prezıdent Qasym-Jomart Toqaevtyń tapsyrmasyna sáıkes tórt kompanıamen jalpy quny 173 mlrd teńge bolatyn ınvestısıalyq kelisimderdi maquldaǵan. Tıisti qaýlyǵa Premer-mınıstr Oljas Bektenov qol qoıdy.
Jobalar aıasynda 356 ataýly dári-dármek, onyń ishinde áleýmettik mańyzy bar preparattar óndiriledi. Olar onkologıalyq, endokrındik aýrýlarǵa arnalǵan dárilerdi, sondaı-aq vırýsqa qarsy, ımmýnobıologıalyq jáne qabynýǵa qarsy medısınalyq quraldardy qamtıdy.
Farmasevtıkalyq zaýyttar Almaty qalasynda (eki zaýyt), Túrkistan jáne Almaty oblystarynda boı kóteredi. Investjobalar nátıjesinde 675 jańa jumys orny ashylady.
Jańa óndirister iske qosylǵan soń, eldiń dári-dármekke ımportqa táýeldiligi tómendep, otandyq medısınalyq ónimderdiń qoljetimdiligi artady.