Ekibastuzda sot psıhonevrologıalyq dıspanserde 30 jyldan asa ýaqyt esepte turǵan jergilikti turǵynǵa qatysty qylmystyq isti qarady, - dep habarlaıdy aqshamnews.kz tilshisi.
IRBIS TV málimetinshe, oqıǵa 2025 jylǵy qyrkúıekte bolǵan. İs materıaldaryna saı, áıel jumystan úıine kelgen soń erli-zaıypty arasynda qyzǵanyshtan janjal shyqqan. Mas kúıdegi er adam qolyna sháınek alyp, áıeliniń basynan eki ret urǵan. Jábirlenýshi esinen tanyp, bas-mı jaraqatymen aýrýhanaǵa jetkizilgen.
Oqıǵa boıynsha qylmystyq is qozǵalǵanymen, sot talqylaýy uzaqqa sozylmaǵan. Ekibastuz qalalyq soty er adamdy aqyl-esi kem dep tanyp, oǵan medısınalyq sıpattaǵy májbúrleý sharalaryn qoldaný týraly qaýly shyǵarǵan.
"Jalpy tıptegi psıhıatrıalyq stasıonarda májbúrli em taǵaıyndalsyn", - delingen sot sheshiminde.
Erli-zaıyptynyń nekede turǵanyna 35 jyldan asqany belgili. Sotta jábirlenýshi kúıeýin ómir boıyna emdeýge jiberýdi talap etetinin málimdegen. Bul ustanymdy olardyń qyzy da qoldaǵan, ol - er adamnyń resmı qamqorshysy. Qyzynyń aıtýynsha, ákesi anasyna únemi kúsh kórsetip otyrǵan.