2025 jyly Qazaqstanda 54,4 myń otbasyny qamtyǵan 292,7 myń adamǵa jalpy somasy 33,4 mlrd teńge ataýly áleýmettik kómek (AÁK) tólendi, dep habarlaıdy Aqshamnews.kz tilshisi.
Eńbek jáne halyqty áleýmettik qorǵaý mınıstrliginiń málimetinshe, ataýly áleýmettik kómektiń negizgi maqsaty – otbasylarǵa aqshalaı qoldaý kórsetý jáne eńbekke qabiletti múshelerin jumyspen qamtýdyń belsendi sharalaryna tartý arqyly qıyn ómirlik jaǵdaıdan shyǵýyna yqpal etý.
AÁK aıasynda tabysy kedeılik sheginen aspaıtyn azamattarǵa toqsan saıyn áleýmettik kómek taǵaıyndalady. Sonymen qatar, tabysy az otbasylardaǵy 1 jastan 6 jasqa deıingi ár balaǵa aı saıyn 1,5 AEK mólsherinde qosymsha tólem qarastyrylǵan. 2025 jyly AÁK alýshy otbasylar qataryndaǵy mektep jasyna deıingi 91,1 myń balaǵa 4,1 mlrd teńge kóleminde qosymsha tólem berilgen.
Budan bólek, ataýly áleýmettik kómek alýshylardy jumyspen qamtý sharalary da júzege asyrylady. Atap aıtqanda, jumysqa ornalastyrý, óz isin ashýǵa nıetti otbasylarǵa grant berý, qajet bolǵan jaǵdaıda biliktilikti arttyrý kýrstaryna joldaý kózdelgen.
AÁK taǵaıyndaý úshin ótinishti azamattar turǵylyqty jeri boıynsha mansap ortalyǵyna, aýyldyq okrýg ákimdigine nemese elektrondyq úkimet portaly (egov.kz) arqyly bere alady.
Aıta keteıik, jaýapty mınıstrlik basshysy Prezıdent Qasym-Jomart Toqaevqa bergen esebinde Qazaqstanda AÁK tóleýdiń jańa tásili engiziletinin habarlaǵan. Al 2024 jyldyń qorytyndysy boıynsha 413,7 myń adamǵa 39,5 mlrd teńge kóleminde ataýly áleýmettik kómek kórsetilgen.