Almatynyń №78 mektep-gımnazıasynda Bilim basqarmasyna qarasty Qalalyq bilim berýdegi jańa tehnologıalardyń ǵylymı-ádistemelik ortalyǵynyń qoldaýymen «Salamatty mektep» ulttyq jobasy aıasynda semınar ótti.
Maqsaty – bastaýysh synyp oqýshylaryna arnalǵan «Salaýatty tamaqtaný mektebi» avtorlarynyń kásibı tájirıbesin taratý, durys tamaqtaný boıynsha oqý-tárbıe úderisine tıimdi ádisterdi utymdy engizý, pedagogterdiń ózara tájirıbe almasý alańyn qurý.
Semınarǵa «Salamatty mektep» ulttyq jobasyna atsalysyp júrgen 80-nen astam bilim berý uıymynyń ókilderi qatysty.
İs-sharany №78 mektep-gımnazıa dırektory Qundyz Sádýaqasova quttyqtaý sózimen ashyp, bastaýysh synyp oqýshylary úshin durys tamaqtaný mádenıetin qalyptastyrýdyń mańyzdylyǵyn atap ótti.
Qalalyq bilim berýdegi jańa tehnologıalardyń ǵylymı-ádistemelik ortalyǵynyń bólim jetekshisi, «Salamatty mektep» jobasynyń úılestirýshisi Tatána Vladımırovna balalardyń densaýlyǵyna alańdaýshylyqtan týyndaǵan durys tamaqtaný jobasymen jan-jaqty tanystyrdy. Durys tamaqtaný mádenıetin adam boıynda erte jastan qalyptastyrýdyń mańyzdylyn aıqyndaıtyn ǵylymı-tájirıbelik málimetterge sáıkes, osy №78 mektep-gımnazıanyń bastaýysh synyp muǵalimderi Gúlmıra Rozybakıeva, Alla Handogına jáne atalǵan ortalyqtyń bólim jetekshisi Zýlfıra Bıbalınova birlesip, 1-4-synyp oqýshylaryna arnalǵan «Salaýatty tamaqtaný mektebi» baǵdarlamasyn ázirledi.
Búgingi kúni oqýshylardyń densaýlyqqa zıandy taǵamdardan bas tartyp, adam aǵzasyna paıdaly azyqtarmen densaýlyq kútimin nyǵaıtýdy kózdeıtin joba boıynsha jumys isteıtin mektepter sany arta bastady.
«Elimizde Oqý-aǵartý mınıstrligi men Densaýlyq saqtaý mınıstrliginiń birlesken «Salamatty mektep» ulttyq jobasyn júzege asyrý aıasynda «Durys tamaqtaný mektebi» baǵdarlamasyna Almaty qalasynyń barlyq mektebi tolyq qatysady. Aıtýly joba sheńberinde jyl saıyn pedagogterge arnalǵan qalalyq, óńirlik, respýblıkalyq ádistemeler baıqaýlary uıymdastyrylady. Atap aıtsaq, ótken jyly osy №78 mektep-gımnazıanyń bastaýysh synyp muǵalimi Saıda Magamedova Respýblıkalyq úzdik ádistemeler baıqaýynyń jeńimpazy atandy. Jalpy, «Durys tamaqtaný mektebi» baǵdarlamasyna qyzyǵýshylyq tanytqan pedagog, ata-ana, oqýshy úshin barlyq resýrs qoljetimdi, ádistemelik oqý quraldary men jumys dápterleri ǵalamtorǵa júktelgen. Árıne, munyń bári baǵdarlama avtorlarynyń úzdiksiz izdenisi men tabandylyqpen atqarǵan eńbekteriniń nátıjesi», – dep atap ótti «Salamatty mektep» ulttyq jobasynyń úılestirýshisi Tatána Vladımırovna.
Semınarda baǵdarlama avtorlary – Gúlmıra Rozybakıeva, Alla Handogına bastaýysh synyptarǵa arnalǵan «Durys tamaqtaný mektebi» baǵytyndaǵy jumys tájirıbelerimen bólisti. Bastaýysh synyp oqýshylarynyń kókónis pen jemistiń adam aǵzasyna paıdasy týraly ázirlegen kórsetilimi salaýatty tamaqtaný mektebi – densaýlyq kútiminiń negizi ekenin aıshyqtaı tústi.