Qaqaǵan aıaz kezinde Shýchınsk qalasynyń Instıtýt shaǵyn aýdany qazandyqtaǵy apat saldarynan jylýsyz qaldy, dep habarlaıdy Aqshamnews.kz tilshisi.
Qaladaǵy №20 qyzmettik qazandyqtyń isten shyǵýyna baılanysty tótenshe jaǵdaı tirkelip, komýnaldyq qyzmetter jylý berýdi ýaqytsha toqtatýǵa májbúr bolǵan. Sonyń saldarynan birneshe turǵyn úı jylýdan ajyrap, turǵyndar sýyqta qaldy.
Oqıǵaǵa baılanysty Býrabaı aýdanynyń ákimi Araı Sadyqov áleýmettik jeli arqyly turǵyndarǵa úndeý jasap, jaǵdaıǵa túsinistik tanytýdy surady.
«Qurmetti Shýchınsk qalasy, Býrabaı aýdanynyń turǵyndary! Búgin №20 qyzmettik qazandyqta apatty jaǵdaı oryn aldy. Osyǵan baılanysty Instıtýt shaǵyn aýdanyna jylý berý ýaqytsha toqtatyldy. Qazirgi tańda barlyq kúsh-jiger apatty joıýǵa baǵyttaldy», – dep jazdy aýdan ákimi.
Ákimniń aıtýynsha, jóndeý jumystary táýlik boıy júrgizilip jatyr. Mamandar aqaýdy múmkindiginshe qysqa merzimde qalpyna keltirýge kúsh salýda. Sondaı-aq aýdan basshysy jaǵdaıdyń baqylaýda ekenin aıtyp, apat saldary jaqyn ýaqytta joıylyp, jylý berý qaıta iske qosylatynyn jetkizdi.