Atyraýda túngi klýbtardyń birinde er adam soqqyǵa jyǵylǵan sáttiń vıdeosy áleýmettik jelide tarady, dep habarlaıdy Aqshamnews.kz tilshisi.
Aldyn ala málimetke sáıkes, oqıǵa 18 qańtar kúni túnde «Zillon» túngi barynda bolǵan.
Jelide jarıalanǵan beınejazbada janjaldyń aldymen mekeme ishinde bastalǵany baıqalady. Kadrlardan eki er adamnyń bir adamǵa kúsh kórsetkenin kórýge bolady. Keıin arasha túspek bolǵan úshinshi adam da soqqy alǵan.
Tóbeles odan ári dalada jalǵasqan. Oqıǵaǵa baılanysty Atyraý oblystyq Polısıa departamenti túsinikteme berdi.
Vedomstvonyń málimetinshe, 18 qańtar kúni «102» nómirine qaladaǵy oıyn-saýyq oryndarynyń birinde quqyqqa qarsy áreket jasalǵany týraly habar túsken.
«Polısıa qyzmetkerleri 32 jáne 33 jastaǵy eki kúdiktini anyqtap, ustady. Atalǵan derek boıynsha buzaqylyq babymen sotqa deıingi tergep-tekserý bastaldy. Kúdiktiler ýaqytsha ustaý ızolátoryna qamaldy», – delingen polısıanyń habarlamasynda.