Eks-jaıdarmanshy Aıbek Baınazarov beıtanys qyzǵa jasaǵan orynsyz áreketin ázil retinde baıandap, qoǵam narazylyǵyn týdyrdy, dep habarlaıdy Aqshamnews.kz tilshisi.
Ol bul oqıǵa týraly ázilkesh Darhan Ospanov júrgizetin «Shaı áńgime» YouTube shoýynda aıtyp bergen. Aıtýynsha, jas kezinde poıyzda mas kúıde beıtanys boıjetkenge tıisken. Suhbattyń úzindisi keıin Threads áleýmettik jelisinde tarady.
Jeli qoldanýshylarynyń aıtýynsha, Aıbek Baınazarov bolǵan jaǵdaıdy ókinishpen emes, kerisinshe ázilge aınaldyryp jetkizgen. Stýdıadaǵy júrgizýshi men qonaqtardyń da áńgimeni toqtatpaı, kúlkimen qabyldaýy kópshiliktiń narazylyǵyn kúsheıtti.
Beınejazba áleýmettik jelide keńinen talqylanyp, rezonans týdyrdy. Qoldanýshylar Aıbek Baınazarovtyń sózin de, ony toqtatpaǵan júrgizýshi Darhan Ospanovty da synǵa aldy. Kópshilik mundaı áńgimelerdiń zorlyq-zombylyq pen harassmentti qalypty jaǵdaı retinde kórsetýi qaýipti ekenin atap ótti.
Áıelder qaýymy poıyzdar men qoǵamdyq oryndarda oryn alǵan osyndaı oqıǵalardan alǵan psıhologıalyq soqqylary týraly pikirlerin bólise bastady.
Osydan keıin Darhan Ospanov túsirilim men montaj barysynda áńgimeniń aýyr kontekstine mán bermeı qalǵanyn aıtyp, keshirim surady. Alaıda bul málimdeme jeli qoldanýshylarynyń ashýyn basa almady. Kóp uzamaı «Shaı áńgime» baǵdarlamasynyń atalǵan shyǵarylymy YouTube platformasynan óshirildi.
Eske salaıyq, 2018 jyly «Talgo» poıyzynda bolǵan zorlyq oqıǵasy Qazaqstan qoǵamynda úlken rezonans týdyrǵan edi.