20 qańtarda Qyzylorda qalasynda Qazaqstan Respublıkasy Prezıdentí Qasym-Jomart Toqaevtyń tóraǵalyǵymen Ūlttyq qūryltaıdyń V otyrysy óttí. Onda memlekettík bılík ókílderí, sarapshylar qauymy, ǵylym, bıznes pen azamattyq sektordyń ókílderí bas qosty. Óńírlík kommunıkatsıyalar qyzmetí Qūryltaıǵa qatysqandarmen sūqbattasyp, otyrysta kóterílgen negízgí taqyryptar men bastamalar jóníndegí olardyń píkírín bíldí.
Qūryltaı áleumettík-ekonomıkalyq damu men sayası reformadan bastap strategıyalyq máselelerdí talqylaıtyn alań retínde qalyptasty. Bıyl Memleket basshysy eldíń sayası júıesínde bolatyn ózgerísterge toqtaldy. Olardyń qatarynda bír palataly Parlamentke kóshu, Vıtse-Prezıdent ınstıtutyn engízu men bılíktíń tarmaǵyndaǵy ókílettílíktí qaıta bólu bar.
Ekonomıkalyq sektsıya jūmysyna QR Parlamentí Májílísíníń deputaty Mūrat Ábenov te qatysty. Onyń aıtuynsha, Qūryltaıda bank sektoryn retteuge baılanysty ózektí taqyryptar, atap aıtqanda tolyqtaı onlaın-nesıeleuge kóshu men azamattardyń esepshotyn būǵattau jaǵy da aıtylǵan.
«Bankter qazír bereshek adamnyń esepshotyn tolyq būǵattaı alady. Būl azamattardyń qūqyǵyn shekteu degen sóz. Mūndaıdy ne múldem alyp tastau kerek, ne tabystyń 50 paıyzynan aspaıtyndaı etíp shekteu qajet», – deıdí deputat. Ol sektsıyalyq otyrystar barysynda medıtsına, mektepterdí jaraqtandyru men eńbek qatynastary da talqylanǵanyn, Qūryltaıda būǵan deıín aıtylǵan ūsynystyń bírazy júzege asa bastaǵanyn da atap óttí.
Senat deputaty Darhan Qydyrálí júrgízílíp jatqan reformalardyń sabaqtastyǵyna nazar audardy. Onyń píkírínshe, jańa Konstıtutsıya men parlamenttík ózgerísterdí talqylau – reformalardyń zańdy jalǵasy.
«Búgín eldíń bolashaǵy men onyń Negízgí zańyna qatysty talaı mańyzdy nárse aıtyldy, talaı dúnıe qozǵaldy osy joly. Būl qazírgí zamanǵy syn-qaterler men qoǵam sūranysyna tolyqtaı jauap beredí», – deıdí senator.
Qūryltaıǵa qatysqan taǵy bír spıker – Ahmet Baıtūrsynūly atyndaǵy Tíl bílímí ınstıtutynyń dırektory Anar Fazyljanova otyrystyń Qyzylordada ótuíníń sımvoldyq mání bar ekenín atap ótíp, óńírdegí oń ózgerísterge joǵary baǵa berdí. Onyń aıtuynsha, lıngvıster elímízdíń ár óńíríndegí tílge baılanysty jaǵdaıdy únemí zerttep otyrady eken. Osy jolǵy saualnamada Qyzylorda oblysy memlekettík tíldí meńgeru deńgeıí jaǵynan da eń joǵary kórsetkíshke ıe bolypty. Osy oraıda ol óńír tūrǵyndaryna qazaq tílíne degen qūrmetí úshín alǵys bíldírdí.
Bıznes ókílí, kásípker Syrymbek Tau búgíngí tańda shaǵyn jáne orta bızneske túsíp otyrǵan auyr júktemege nazar audardy. Onyń aıtuynsha, onlaın-platformalardyń komıssıyalary, joǵary paıyzdyq nesıeler men salyqtyq míndettemeler kásípkerlíktíń damuyna kádímgídeı kedergí keltíríp otyr.
«Shaǵyn jáne orta bıznes bes mıllıondaı adamdy jūmyspen qamtyp otyrǵanymen, kásípkerler qazír qarjy jaǵynan qatty qıyndyq kóríp jatyr. Mysaly, bíz nesıení 25 paıyzben alamyz, 15 paıyzyn onlaın-platformalarǵa tóleımíz, 16 paıyz qosylǵan qūn salyǵy, būdan bólek basqa da shyǵyndar bar. Sodan kásípkerge túsetín júkteme shamamen 78 paıyzǵa jetedí. Būl bıznestí qoldau emes, onyń múmkíndíkterín shekteu», – deıdí.
Qūryltaı jūmysyna Asqar Jūmadíldaev ta qatysty. Akademıktíń aıtuynsha, memleket basshysy qazaqty tehnokrat ūlt boluǵa úndep júr. Ókíníshke qaraı, qazír bízdíń qoǵam jasandy ıntellektíníń ne ekenín bílgenímen, ol turaly álí de tereń bíle bermeıdí eken. Jasandy ıntellektíní damytqanda ol turaly bílím beríp, onyń paıdaly jáne zıyandy jaǵyn da qatar oqytuymyz kerek degen oı aıtty akademık Qūryltaıda.
Ǵylym jáne bílím sektsıyasynda medıtsına ǵylymdarynyń doktory, professor, QR ŪǴA akademıgí Dılyara Qaıdarova sóz sóıledí. Ol ǵylymdy damytuǵa qatysty júıelí máselelerdí, atap aıtqanda ǵylymı jurnaldardyń sapasy men Ūlttyq ǵylym akademıyasynyń qamqorlyǵymen joǵary ımpakt-faktory bar bíryńǵaı ǵylymı basylym qūru qajettílígí kóterílgenín aıtty. Sonymen qatar, sarapshy balalar arasyndaǵy semízdíkke nazar audaryp, olardy erte jastan salauatty ómír saltyna shaqyryp, sondaı mádenıetí qalyptastyruǵa baǵyttalǵan memlekettík baǵdarlama ázírleudí ūsyndy.
Qūryltaıǵa qatysushylardyń píkírínshe, bılík pen sarapshylar qauymdastyǵy arasyndaǵy ashyq dıalog formaty ózektí máselelerdí kóteríp, eldíń ūzaq merzímdí damuyna, qoǵamnyń naqty sūranystaryna baǵyttalǵan sheshímder qabyldauǵa múmkíndík beredí.