Shymkentte kísí qolynan qaza bolǵan 21 jastaǵy studenttíń aǵasy Sūltan Seríkbaı Prezıdent Qasym-Jomart Toqaevqa alǵys aıtty, - dep habarlaıdy aqshamnews.kz tílshísí Tengrinews.kz-ke sílteme jasap.
Marqūmnyń aǵasy būl turaly Threads-paraqshasynda jazdy.
"Prezıdentímízge myń alǵys! Kóp nárse aıtqym keledí, bíraq dál qazír emes. Uaqyty kele tolyqtaı búkíl jaǵdaıdy aıtyp beretín bolamyn. Qazír bízge eń bastysy "sot" protsesíníń ádíl jáne onlaın formatta ótuí. Senemín", – dep jazdy ol.
Eske salaıyq, Memleket basshysy Qasym-Jomart Toqaev Qyzylordada ótken Ūlttyq qūryltaı otyrysynda Nūraı Seríkbaıdyń ólímíne baılanysty qaıǵyly oqıǵaǵa nazar audarǵan bolatyn. Prezıdenttíń sózínshe, osy oqıǵa boıynsha 130-dan asa ótínísh kelíp túsken.
"Kúdíktíníń Nūraıdy ańdyp, maza bermeı, qoqan-loqy kórsetkení anyqtalyp otyr. Aqyry, mūnyń arty adam ólímíne ákep soqtyrdy.
Osyǵan baılanysty Íshkí íster mınıstríne Shymkent qalalyq departamentíníń áreketíne qūqyqtyq baǵa berudí tapsyrdym. Bas prokuror da būl máselení mūqıyat tekseredí", - dedí Memleket basshysy.
Būdan keıín Shymkent polıtsıyasynyń bastyǵy Nūrlan Almasbekov jūmysynan bosatylǵany belgílí boldy.
Aıta keteıík, 11 qańtar Shymkentte pyshaq jaraqattarynan 21 jastaǵy student Nūraı qaza tapty. Polıtsıya adam óltíru deregín rastady jáne qylmystyq ís qozǵady. Kúdíktí - marqūmnyń tanysy, ol ūstaldy.