Qyrǵyzstanmen shekaradaǵy "Kegen" ótkizý beketi táýlik boıy jumys isteıtin bolady

Qyrǵyzstanmen shekaradaǵy "Kegen" ótkizý beketi táýlik boıy jumys isteıtin bolady, - dep habarlaıdy aqshamnews.kz tilshisi. 

Májilis 2003 jylǵy 25 jeltoqsandaǵy Qazaqstan men Qyrǵyzstan úkimetteri arasyndaǵy Memlekettik shekara arqyly ótkizý pýnktteri týraly kelisimge ózgerister men tolyqtyrýlar engizý týraly hattamany ratıfıkasıalady. Qujatqa 2024 jylǵy 19 sáýirde Astanada qol qoıylǵan.

Túzetý "Kegen-avtojoldyq" (Qazaqstan Respýblıkasy) – "Qarqara-avtojoldyq" (Qyrǵyz Respýblıkasy) ótkizý pýnktiniń jumys rejımin "táýliktiń jaryq ýaqytynan" "táýlik boıyna" ózgertýdi kózdeıdi. Bul sheshim Qazaqstan men Qyrǵyzstan shekaralyq yntymaqtastyǵyn odan ári damytýǵa, taýar aınalymyn arttyrýǵa, týrızm salasyndaǵy yntymaqtastyqty keńeıtýge septigin tıgizedi.

Anyqtama úshin: Qyrǵyzstanmen shekarada 12 ótkizý beketi bar, onyń 8-i kópjaqty ("Kegen", "Qarasý", "Qordaı", "Sypataı batyr", "Aısha-bıbi", "Sartóbe", "Aýhatty", "Chaldovar") jáne tórteýi ekijaqty (Aqsý, Besaǵash, Alataý, Jaıyl). Qyrǵyz Respýblıkasymen shekara halyqaralyq quqyqqa sáıkes tolyǵymen bekitilgen.