Almatyda qala ákiminiń orynbasary Abzal Núkenov jas ǵalymdarmen kezdesip, ǵylym men tehnologıany damytý jáne olardy qalalyq basqarý júıesinde tájirıbede qoldaný jaıy sóz boldy.
Talqylaý bolashaqty boljaýǵa, uzaq merzimdi damý kórinisin qalyptastyrýǵa jáne aldaǵy syn-qaterdi eskere otyryp, naqty sheshimder usynýǵa baǵyttalǵan forsaıt - strategıalyq dıalog formatynda ótti.
Kezdesý barysynda qatysýshylar ǵylymı zertteýlerdi qalalyq úderisterge engizý, ınovasıalyq jobalardy qoldaý, sıfrlyq tehnologıany damytý, ekologıalyq sheshimder men qalalyq ınfraqurylym salasyndaǵy ǵylymı ázirlemelerdi júzege asyrý, sondaı-aq ǵylym men óndiris arasyndaǵy ózara baılanysty nyǵaıtý jóninde usynystaryn ortaǵa saldy. Bul bastamalar qalanyń áleýmettik-ekonomıkalyq damýy úshin mańyzdy qadamdar retinde baǵalandy.
«Qalanyń strategıalyq damýy ǵylymsyz múmkin emes. Jas ǵalymdardyń ıdeıalary men zertteýleri Almatyny ınovasıalyq ári básekege qabiletti megapolıske aınaldyrýdyń berik negizi sanalady. Qala ákimdigi ǵylymı qaýymdastyqpen ashyq ári turaqty dıalog ornatýǵa jáne ǵylymı bastamalardy naqty jobalarǵa aınaldyrýǵa múddeli. Ǵylym - qalanyń zamanaýı ári ornyqty damýynyń basty sharty», - dedi Almaty ákiminiń orynbasary Abzal Núkenov.
Ǵylymı zertteýlerdi qoldaý maqsatynda bıyl óńirlik granttar taǵaıyndaý boıynsha baıqaý ótkizý josparlanyp otyr. Granttar qoldanbaly ǵylymı-zertteý jobalaryn júzege asyrýǵa jáne onyń nátıjesi komersıalandyrýǵa baǵyttalady. Qarjylandyrý jergilikti búdjet esebinen qarastyrylǵan.
Aıta keteıik, bul kezdesý 2025 jyly qurylǵan Almaty qalasy ákimdigi janyndaǵy Ǵylym jáne tehnologıalar jónindegi keńes aıasynda ótti. Keńestiń negizgi mindeti - ǵylymı áleýetti qalanyń damý saıasatyna ushtastyrý jáne zertteýlerdi naqty praktıkalyq sheshimder men jobalarǵa baǵyttaý.
Ǵylym jáne tehnologıalar jónindegi keńes Memleket basshysynyń óńirdegi ınovasıalyq ekojúıeni damytý jónindegi tapsyrmalaryna sáıkes 2025 jyldan bastap jumysyn bastady. Keńes quramyna ǵylymı qaýymdastyq ókilderi, joǵary oqý oryndarynyń basshylary men jas ǵalymdar endi.