Sátbaev ýnıversıtetinde Ortalyq Azıa bilim berýdi akredıtteý qaýymdastyǵy (CAAAE) jáne Injenerlik bilim berýdi akredıtteý boıynsha Eýropalyq jeli (ENAEE) uıymdastyrǵan halyqaralyq deńgeıdegi mańyzdy is-sharalar ótti. Osy is-sharalar aıasynda «ENAEE jelisiniń akredıtteý agenttikterine qoıylatyn talaptar» atty halyqaralyq semınar jáne ENAEE-niń 29-shy Bas Assambleıasy uıymdastyryldy.
Assambleıa jumysyna Avstrıa, Fransıa, Italıa, Ispanıa, Ulybrıtanıa jáne basqa da 15 elden kelgen 16 akredıtteý agenttiginiń basshylary, sondaı-aq ınjenerlik bilim berý sapasyn qamtamasyz etý salasyndaǵy qazaqstandyq jáne halyqaralyq sarapshylar qatysty.
Jıyndy Sátbaev ýnıversıtetiniń rektory Meıram Begentaev quttyqtaý sózimen ashty. Ol ýnıversıtettiń halyqaralyq akredıtasıaǵa qatysýynyń mańyzdylyǵyn atap ótip, bul sharanyń óńirdegi ınjenerlik bilim berý sapasyn arttyrýǵa, sondaı-aq bolashaqta stýdentterdiń mansap jolynda tabysqa jetýine yqpal etetinine senim bildirdi. Sonymen qatar, rektor EUR-ACE akredıtasıasynyń ınjenerlerdi joǵary deńgeıde daıarlaýdy qamtamasyz etýdegi mańyzdylyǵyn erekshe atap ótti.
ENAEE prezıdenti Joze Karlos Kvadrado óz sózinde halyqaralyq yntymaqtastyqty nyǵaıtý jáne ınjenerlik bilim berý baǵdarlamalaryn Eýropada ǵana emes, basqa aımaqtarda da damytý qajettigin aıtty. Ol Eýropalyq odaq pen Ortalyq Azıa arasyndaǵy yntymaqtastyqty keńeıtý arqyly aımaqtaǵy stýdentterge jańa mansaptyq múmkindikter ashýǵa nazar aýdardy.
Profesor Joze Karlos Kvadrado Ortalyq Azıadaǵy ınjenerlik bilim berý baǵdarlamalaryn akredıtteýdi jetildirýge baǵyttalǵan iri jobalardyń bastamashysy bolyp tabylady. ENAEE uıymdastyrǵan is-sharalar óz kezeginde Eýropa men Ortalyq Azıa arasyndaǵy tájirıbe almasýdy qamtamasyz etetin jáne ınjenerlik bilim berý sapasyn arttyrýǵa arnalǵan mańyzdy alań retinde qyzmet etedi.
Bul kezdesýler ınjenerlik bilim berý salasyndaǵy halyqaralyq standarttardy engizýdi jáne aımaqtyq yntymaqtastyqty nyǵaıtýdy kózdeıtin mańyzdy qadam boldy.
