Stansa ataýyn ózgertýdi qoldaımyn.
QR Ulttyq qaýipsizdik komıtetiniń burynǵy tóraǵasy Sát Besimbaıuly qala ákiminiń shahardaǵy eki stansanyń ataýyn ózgertýi týraly usynysyn qoldaıdy, dep habarlaıdy Almaty-akshamy.kz.
«Qala basshysynyń usynysyn eki qolymdy kóterip turyp qoldaımyn. Biri «Dostyq» stansasyna Baýyrjan Momyshulynyń esimin berý. Baýyrjan qazaqtyń mańdaıyna buıyrǵan erjúrek batyry. Batyr Baýyrjannyń esimin qazaq halqy erekshe qadirleıdi. Elimizde búgingi kúni batyr esimin ulyqtaý maqsatynda aýqymdy ister atqarylýda. Solardyń biri stansaǵa batyr esimin berý bolar edi. Óskeleń urpaq tarıhı tulǵalardy tanyp bilý úshin olardyń esimin ulyqtaý máńgi paryz bolyp qalady», - dedi S. Besimbaıuly.
Onyń aıtýynsha, Baýyrjannyń qaıtalanbas minezi men tulǵasy naǵyz elikteýge turarlyq fenomen. Ondaı minezdi qazaq áli týǵan joq.
«Bizdiń qazaqqa osy Baýyrjan minezdi adamdar óte kerek-aq. Stansanyń ataýynan keıin ol jaıly bilmeıtin adamdar oılanýy múmkin. Sondyqtan metroǵa uly tulǵanyń atyn berý oılanbaı qabyldanýy kerek sheshim der edim», - deıdi Ulttyq qaýipsizdik komıtetiniń burynǵy tóraǵasy.