Kúdikti buǵan deıin kisi óltirgeni úshin sottalyp, 10 jylǵa bas bostandyǵynan aıyrylǵan
Memleket basshysy Qasym-Jomart Toqaevqa Túrkistan oblysynyń Saryaǵash aýdanynda 5 jasar qyzdyń óltirilgeni jónindegi qaıǵyly oqıǵa týraly málimet berildi, dep habarlaıdy Almaty-akshamy.kz.
Quqyq qorǵaý organdary isti tergeý amaldaryn júrgizip jatyr. Kúdikti anyqtaldy.
Qolda bar aqparat boıynsha, kúdikti buǵan deıin kisi óltirgeni úshin sottalyp, 10 jylǵa bas bostandyǵynan aıyrylǵan. Bıyl oǵan adam densaýlyǵyna qasaqana aýyr zıan keltirgeni úshin 3 jylǵa bas bostandyǵyn shekteý jóninde úkim shyǵarylǵan.
Prezıdent Bas prokýratýra men İshki ister mınıstrligine bolǵan qaıǵyly oqıǵanyń mán-jaıyn muqıat tekserýdi tapsyrdy. Toqaev bıyl shyǵarylǵan sot úkiminiń zańdylyǵyn qarastyrý jáne adamǵa qatysty asa qaýipti qylmys jasaǵany úshin qylmystyq jaýapkershilikti kúsheıtý mańyzdy dep sanaıdy.
Prezıdent balanyń týystary men jaqyndaryna qaıǵyryp kóńil aıtty.
Buǵan deıin habarlaǵanymyzdaı, 13 shildede Saryaǵash polısıasyna jergilikti turǵyn 5 jasar qyzy joǵalyp ketkenin habarlaǵan.
Jedel-izdestirý sharalary barysynda polıseıler aýyl turǵyndarynyń biriniń úıinen dene jaraqaty bar qyzdyń máıitin tapty.