Astanada Qarýly kúshter Ulttyq áskerı-patrıottyq ortalyǵynyń Ortalyq ansambli uıymdastyrǵan «Sarbaz sahnasy» shyǵarmashylyq ujymdary búkilarmıalyq festıvaliniń Gran-prı ıegeri men laýreattaryn marapattaý rásimi ótti, dep habarlaıdy almaty-akshamy.kz.
2019 jyldan beri ótkizilip kele jatqan baıqaýǵa 60-tan astam ótinim túsip, onyń ishinen 45 nómir irikteldi. Qatysýshylardyń sheberligi jeke oryndaý, aspaptyq, úrmeli jáne fólklorlyq ansámblderdiń, jeke jáne toptyq bı nómirleriniń, sondaı-aq fotosýretter, kartınalar, panelder jáne halyqtyq qolóner jumystary boıynsha baǵalandy.
«Sarbaz sahnasy» búkilarmıalyq festıvaliniń bas júldesin quramynda Maqsat Rahıev, Janbolat Sháripov, Saıahat Turlybekov, Bekbolat Tóken («Shyǵys» óńirlik qolbasshylyǵy) bar «Alash» kvarteti jeńip aldy. Syılyqty olarǵa Qorǵanys mınıstriniń orynbasary Darhan Ahmedıev tabys etti.
Vokaldyq oryndaýda kishi serjant Erlan Áshimov (85395 áskerı bólimi) úzdik dep tanyldy. Qarýly kúshterdiń qyzmetkeri Aısan Ǵabıdollaev (63310 áskerı bólimi) ekinshi oryndy ıelendi, Úshinshi oryn Qarýly kúshterdiń qyzmetkeri Erbol Qýanbektiń (61993 áskerı bólimi) enshisinde.
«Aspaptyq ansámblder» nomınasıasynda «Jańa ǵasyr» fólklorlyq ansambli («Shyǵys» ÓńQ) jeńiske jetti. Ekinshi oryn Batyrhan Shúkenovtiń «Otan Ana» ánin oryndaǵan saksofonshy qatardaǵy jaýynger Qýanysh Názipbekke (75263 áskerı bólimi) buıyrdy. Úshinshi oryn «Áke tolǵaýy» ánimen óner kórsetken dombyrashy aǵa serjant Nurjan Mahanovqa (Qurlyq áskerleriniń áskerı ınstıtýty) berildi.
Bı ónerinde «Áskerı arýlar» toby (61993 áskerı bólimi) erekshelendi. Ekinshi oryn «Amanat» bıshilerine (32355 áskerı bólimi) buıyrdy. Al úshinshi oryn «Asý» bı tobyna (03858 áskerı bólimi) berildi.
Qazylar alqasy ataqty qolbasshylar Baýyrjan Momyshuly men Ivan Panfılovtyń portretterin usynǵan efreıtor Maksım Svırıdovtyń (18404 áskerı bólimi) jumysyn úzdik dep tanydy. Ekinshi orynda Qarýly kúshterdiń qyzmetkeri Aınur Asqarqyzy (32355 áskerı bólimi). Ol qazylar alqasyn stıldendirilgen ulttyq bas kıimdermen jáne basqa da sándik-qoldanbaly qolóner zattarymen tań qaldyrdy. Úshinshi oryn Qurlyq áskerleri áskerı ınstıtýtynyń kýrsanty Ámire Teleýovke buıyrdy. Ol 2019 jyldan 2022 jylǵa deıin áskerı ınstıtýtty basqarǵan general-maıor Dýlat Adyrbekovtyń portretin maıly boıaýmen salǵan.
Qarýly kúshterdiń qyzmetkeri Aıdana Satybaeva (61993 áskerı bólimi) «Kórermen kózaıymy» syılyǵyna ıe boldy. Tólegen Muhamedjanovtyń «Otanym» patrıottyq ánin úzdik oryndaǵany úshin Qarýly kúshterdiń qyzmetkeri Qanat Máýlen (Qurlyq áskerleriniń áskerı ınstıtýty) marapattaldy. Qazylar alqasy quramynda Qarýly kúshterdiń qyzmetkerleri İlıas Baıbosynov, Musa Saparalıev, Aıdos Begim jáne Jazylbek Syrym (61993 áskerı bólimi) bar «Desant» kvartetin avtorlyq án oryndaýshylar júldesimen marapattady.
«Órleý» fólklorlyq kýrsanttar ansambliniń (Radıoelektronıka jáne baılanys áskerı-ınjenerlik ınstıtýty) óneri kótermeleý júldesimen marapattaldy. Qazylar alqasy, sondaı-aq 3-synypty serjant Azamat Amanturovty (91678 áskerı bólimi) úzdik oryndaýshy dep tanydy.
«Sarbaz sahnasy» búkilarmıalyq festıvali qazylar alqasynyń tóraǵasy polkovnık Danıar Qudaıbergenov atap ótkendeı, qatysýshylardyń ónerin baǵalaý kezinde oryndaýshylyq mádenıet, vokaldyq jáne ıntonasıalyq daǵdylar, mýzykalyq aspapty oryndaý tehnıkasyn meńgerý deńgeıi jáne basqa da ólshemder nazarǵa alyndy.
İs-shara festıvál jeńimpazdarynyń qatysýymen ótken gala-konsertpen aıaqtaldy.