Almaty ákimi Erbolat Dosaev jumys sapary barysynda Bostandyq aýdanyndaǵy Balalarǵa shuǵyl medısınalyq kómek ortalyǵynyń operasıalyq blogy bar qabyldaý bólimi jańa korpýsynyń qurylys alańyna bardy, dep habarlaıdy Almaty-akshamy.kz
Qurylys-montaj jumystarynyń qarqynyna nazar aýdaryldy. Aıta keterligi, 2021 jyldyń tamyzynda bastalǵan joba merdiger uıymnyń belgilengen jumysty oryndamaýy sebebinen búgingi kúnge deıin aıaqtalǵan joq. Belgilengen merzimderdi buzǵany úshin kompanıaǵa qatysty sotqa talap aryz berildi. Máselen, sot sheshimimen aǵymdaǵy jyldyń shilde aıynda «Aq orda korporasıasy» JSHS memlekettik satyp alýdyń josyqsyz qatysýshysy bolyp tanyldy, memleket búdjetine 12,3 mln teńgeden astam somada turaqsyzdyq aıyby óndirildi.
Qala basshysy osy jyldyń shilde aıynda aýmaqty aralaý kezinde berilgen eskertýlerdiń joıylýyn tekserdi. Búgingi tańda nysanda 90-ǵa jýyq adam jumys isteıdi. Ǵımarat qurylymy, shatyr, syrtqy qabyrǵalar men bólimderdi qalaý, tereze bloktary jáne ishki árleý jumystary aıaqtaldy. Injenerlik komýnıkasıalar, lıftilerdi ornatý, qasbet, árleý, abattandyrý jumystary jalǵasýda. Erbolat Dosaev qurylys-montaj jumystaryn aǵymdaǵy jyldyń jeltoqsan aıyna deıin aıaqtaýdy tapsyrdy. Budan ári qazirgi ýaqytta satyp alynǵan jáne qoımalarda ornalasqan jabdyq ornatylady.
Búgingi tańda Ortalyq jylyna 110 myńnan astam balaǵa ambýlatorıalyq-dıagnostıkalyq tekserý boıynsha qyzmet kórsetedi. Táýligine qabyldaý bólimine 350-den astam pasıent júginedi. Klınıkanyń qabyldaý bóliminiń shaǵyn ári eski josparmen jasalǵany, onyń ústine júktemeniń ósýi pasıentterdiń aǵynyn retteýdiń trıaj - júıesin engizýge múmkindik bermeıdi. Óz kezeginde, operasıalyq bolgy bar qabyldaý bóliminiń jańa úsh qabatty korpýsy munda kelgen balalardy qabyldaý men bólýdiń jedeldigin, sondaı – aq jalpy-shuǵyl medısınalyq kómek kórsetý sapasyn arttyrýǵa múmkindik beredi. Aıta keterligi,qabyldaý bóliminiń korpýsy aýrýhananyń burynnan bar bir qabatty jaıaý júrginshiler galereıasymen baılanysa alady.
Almaty ákimi qurylys - montaj jumystaryn pasıentterdiń qaýipsizdigi men jaılylyǵynyń barlyq talaptaryna sáıkestigin eskere otyryp júrgizý qajettigine nazar aýdardy: atap aıtqanda, qala basshysy plasıkalyq esikterge, qozǵalýǵa yńǵaıly bolý úshin taqtaıshalardyń bolmaýyna, baspaldaqtarda syrǵanaýǵa qarsy jabynnyń bolýyna nazar aýdardy. Erbolat Dosaev ınfraqurylym ınklúzıany eskere otyryp salynýy jáne qazirgi zamanǵy medısınanyń joǵary standarttaryna sáıkes kelýi tıis ekenin atap ótti. Múmkindikteri shekteýli azamattardyń toptary úshin korpýsta pandýstar jáne taktıldi taqtaıshalardan trassalaý kózdeletin bolady.
Jalpy, Bostandyq aýdanynda medısınalyq mekemelerge júktemeni azaıtý úshin aǵymdaǵy jyly 5 densaýlyq saqtaý nysanyn salý, rekonstrýksıalaý jáne kúrdeli jóndeý josparlanǵan.