Almatyda «Halyq qatysatyn búdjet» qalalyq baǵdarlamasy boıynsha megapolıs turǵyndarynan 6118 ótinish túsken, dep habarlaıdy aqshamnews.kz
Ótinishter máslıhat depýtattarynyń, qoǵamdastyq ókilderiniń, qurylys jáne abattandyrý salasy mamandarynyń qatysýymen ár aýdan ákimdigi janynan qurylǵan saraptamalyq keńesterde saraptaldy.
Sarapshylar kelip túsken ótinimderdi belgilengen sanattar boıynsha «Halyq qatysatyn búdjet» baǵdarlamasynyń talaptary men ólshemsharttaryna sáıkestigine, nobaıy men boljaldy smetasynyń bolýyna baǵa berdi. Endi árbir ótinim úsh mártebeniń birin alady: «Daýys berýge jiberildi», «Qaıta qaraýǵa jiberildi» nemese «Qabyldanbady». «Halyq qatysatyn búdjettiń» barlyq erejelerine sáıkes berilgen ótinimder maquldanady jáne daýys berý kezeńine jiberiledi.
Qaıta qaraýǵa jiberilgen usynystardyń avtorlary aǵymdaǵy jyldyń 10 qazany men 14 qazanyn qosa alǵanda, óz jobalaryn túzetip, qaıta qaraýǵa ótinimder berý múmkindigine ıe bolady.
Avtorlar budget.open-almaty.kz ınternet-portalynda tirkelý kezinde kórsetken elektrondyq poshta meken-jaıyna ótinimdi pysyqtaý qajettiligi týraly habarlama alady. Daýys berýge jiberilgen jobalar «Jobalar» betinde «mártebe» súzgisi arqyly jarıalanady.
«Halyq qatysatyn búdjet» baǵdarlamasy boıynsha keńes nemese aqparatty aýdan ákimdikterinen, sondaı-aq Open Almaty Almaty qalasy ákimdiginiń Qoǵamdyq qabyldaýynan 224-39-29 (ishki 203) telefony arqyly alýǵa bolady.