5,5 mıllıonnan astam adamǵa mindetti nemese usynylǵan evakýasıa týraly habarlamalar jiberilgen
AQSH-tyń Florıda shtatynyń gýbernatory Ron Desantıs jaqyndap kele jatqan «Mılton» daýylyna baılanysty shtat turǵyndaryn dereý evakýasıalaýǵa shaqyrdy, dep habarlaıdy aqshamnews.kz.
AQSH-tyń Tótenshe jaǵdaılardy basqarý jónindegi federaldyq agenttiginiń málimeti boıynsha, 5,5 mıllıonnan astam adamǵa mindetti nemese usynylǵan evakýasıa týraly habarlamalar jiberilgen. Bul – Florıda tarıhyndaǵy eń úlken evakýasıa.
"Eger ketkińiz kelse, qazir ketińiz", – dedi gýbernator baspasóz máslıhatynda.
Ol prezıdent Djo Baıdenniń shtat bıligi usynǵan barlyq sharalardy qoldaıtynyn jáne sý tasqynynyń saldarymen kúresýge AQSH Ulttyq gvardıasynyń 8 myńǵa jýyq qyzmetkeri jumyldyrylatynyn habarlady.
«Mılton» Meksıka shyǵanaǵynda 2005 jyldan beri baıqalǵan eń kúshti daýyl ekeni atap ótildi. Búgin, 9 qazanda ol 3,3 mıllıonnan astam adam turatyn Tampa-Beıge jetedi dep kútilýde. Sınoptıkter daýyldyń qaı jerde bolatynyn áli anyqtaǵan joq. Keshe, 8 qazanda Mıltondy AQSH-tyń Ulttyq daýyl ortalyǵy (NHC) ony 5-sanattaǵy daýyl dep rastady.
NHC málimetteri boıynsha, taıfýn saǵatyna 14,5 km jyldamdyqpen qozǵalady jáne jeldiń jyldamdyǵy saǵatyna 287 km-ge deıin jetedi. Daýyldyń Florıdaǵa jaqyndaýyna baılanysty 1500-den astam reıs toqtatyldy. Mıltonǵa arnalǵan eskertýler shtatta 277 adamnyń ómirin qıǵan «Helen» daýylynan bir aptadan keıin keldi.